वीरगंज (पर्सा), ६ जेठ । नेपाल सरकार मन्त्रिपरिषद्को २०८२ फागुन १२ गतेको निर्णयअनुसार वीरगंज महानगरपालिकाको प्रमुख प्रशासकीय अधिकृतमा सरुवा गरिएका रेशमलाल कँडेललाई महानगरपालिकाले अझै हाजिर हुन नदिएको विषयले प्रशासनिक अन्योल बढाएको छ । प्रमुख प्रशासकीय अधिकृत कँडेल विगत १० दिनदेखि वीरगंजमै रहे पनि महानगरपालिकाले औपचारिक रूपमा हाजिरी गराउने वातावरण नबनाएको हो । यसले महानगरको प्रशासनिक तथा आर्थिक गतिविधि प्रभावित भएको बताइएको छ ।
वीरगंज महानगरका प्रमुख राजेशमान सिंहले भने कँडेल सरुवा भएपछि तत्काल कार्यस्थलमा नआएको आरोप लगाउँदै अहिले मात्रै मन्त्रालयको दबाबपछि आउन खोजेकाले हाजिरी गराउने पक्षमा नरहेको प्रतिक्रिया दिए । उनका अनुसार महानगरले सुरुदेखि नै नयाँ प्रमुख प्रशासकीय अधिकृत पठाउन माग गर्दै आएको थियो । यता प्रमुख प्रशासकीय अधिकृत कँडेलले आफू वीरगंजमै उपस्थित भए पनि कार्यालयमा प्रवेश गरी नियमित रूपमा जिम्मेवारी सम्हाल्ने वातावरण नबनेको बताए । उनले हाल जिल्ला प्रशासन कार्यालयमै बसेर हाजिर हुने प्रतीक्षामा रहेको जानकारी दिए ।
भूमि व्यवस्था, सहकारी तथा सङ्घीय मामिला एवं सामान्य प्रशासन मन्त्रालयका प्रवक्ता एकदेव अधिकारीले भने मन्त्रालय र वीरगंज महानगरबीच यस विषयमा निरन्तर समन्वय भइरहेको बताएका छन् । उनका अनुसार केही दिनभित्रै देखिएको विवाद समाधान हुने अपेक्षा गरिएको छ । यसअघि महानगरमा प्रमुख प्रशासकीय अधिकृतको जिम्मेवारी सम्हालिरहेका अरविन्दलाल कर्णबाट मन्त्रालयले गत वैशाख ४ गते आर्थिक तथा प्रशासनिक अधिकार फिर्ता लिएको थियो । कर्ण महानगरको शिक्षा महाशाखामा कार्यरत १०औँ तहका कर्मचारी हुन् ।
महानगर प्रमुख सिंहले हाल प्रमुख प्रशासकीय अधिकृतको अभावका कारण आर्थिक तथा प्रशासनिक निर्णय प्रभावित भइरहेको दाबी गरेका छन् । 
प्रतिक्रिया दिनुहोस् !