वीरगंज (पर्सा), ५ जेठ । पर्साको पोखरिया नगरपालिकाले आर्थिक वर्ष २०८०/८१ मा औषधि तथा सर्जिकल सामग्री खरिद गर्दा सार्वजनिक खरिद ऐन र नियमावलीको पालना नगरेको तथ्य सार्वजनिक भएको छ । महालेखापरीक्षकको कार्यालय ले सार्वजनिक गरेको वार्षिक प्रतिवेदनले नगरपालिकाको खरिद प्रक्रिया अपारदर्शी र अव्यवस्थित रहेको औंल्याएको हो ।
प्रतिवेदनअनुसार सार्वजनिक खरिद नियमावली, २०६४ को नियम ८५ उपनियम १ (क) ले २० लाख रुपैयाँसम्मको औषधिजन्य सामग्री उत्पादक कम्पनीसँग सोझै खरिद गर्न सकिने व्यवस्था गरेको भएपनि नगरपालिकाले विभिन्न कोटेसनमार्फत औषधि खरिद गरी रकम भुक्तानी गरेको पाइएको छ ।
महालेखाले नगरपालिकाले औषधि खरिदअघि आवश्यक वार्षिक खरिद योजना तयार नगरेको, आपूर्ति हुने औषधि तथा सामग्रीको स्पष्ट विवरणसहित सूचना नराखिएको तथा औषधिको प्रयोग र मौज्दातको एकीकृत अभिलेखसमेत व्यवस्थित नगरेको जनाएको छ ।
यस्तै, आपूर्ति गरिएका औषधि तथा सर्जिकल सामग्री स्टोरमा दाखिला गर्नु अघि तोकिएको स्पेसिफिकेसनअनुसार भए/नभएको परीक्षणसमेत नगरिएको प्रतिवेदनमा उल्लेख गरिएको छ । महालेखाले औषधि खरिद, उपयोग र मौज्दात व्यवस्थापनलाई पारदर्शी, व्यवस्थित र नियमसम्मत बनाउन नगरपालिकालाई सुझाव दिएको छ ।
प्रतिवेदनअनुसार नगरपालिकाले विभिन्न फर्ममार्फत औषधि तथा सर्जिकल सामग्री खरिद गर्दा कुल ३५ लाख ७ हजार ४ सय ६९ रुपैयाँ भुक्तानी गरेको देखिएको छ ।
भुक्तानी पाउने फर्ममध्ये डायनामिक सर्जिकल हबलाई सर्जिकल सामग्री खरिदबापत ५ लाख ११ हजार ७ सय रुपैयाँ, पशुपतिनाथ आयुर्वेद भवन प्रालिलाई आयुर्वेद औषधिबापत ७ लाख ९१ हजार ५ सय ७० रुपैयाँ, शिव मेडि कन्सर्नलाई औषधि खरिदबापत १९ लाख ५६ हजार ३ सय ५ रुपैयाँ तथा इलाइट मेडिहेल्थ कन्सर्न प्रालिलाई १ लाख ४८ हजार ८ सय ९४ रुपैयाँ भुक्तानी गरिएको उल्लेख गरिएको छ ।
महालेखापरीक्षकको कार्यालयले औषधि खरिद प्रक्रिया प्रतिस्पर्धी, पारदर्शी र कानुनसम्मत बनाउन तत्काल सुधार आवश्यक रहेको निष्कर्ष निकालेको छ । 
प्रतिक्रिया दिनुहोस् !