वीरगंज (पर्सा), ४ जेठ । राष्ट्रिय स्वतन्त्र पार्टी (रास्वपा) पर्सा क्षेत्र नं. ४ का सभापति जितेन्द्र मिश्र माथि आइतबार राति अज्ञात समूहले आक्रमण गरेको छ । क्षेत्र अन्तर्गतको छिपहरमाई गाउँपालिका वडा नं. २ टिहुकीमा आयोजित वडा अधिवेशनमा सहभागी भएर वीरगंज फर्कने क्रममा कालिकामाई गाउँपालिका वडा नं. १ स्थित मुडली पुल नजिक उनीमाथि आक्रमण भएको हो ।
घटना आइतबार राति करिब ८ बजे भएको बताइएको छ । आक्रमणका क्रममा मिश्र सवार बिइबी ५७८१ नम्बरको गाडीमा तोडफोड गरिएको प्रहरीले जनाएको छ । अज्ञात समूहको आक्रमणबाट गाडीको अगाडिको सिसा फुटेको भए पनि मिश्र सकुशल रहेका छन् । इलाका प्रहरी कार्यालय पोखरिया का प्रहरी निरीक्षक प्रदिप पौडेलले घटनामा संलग्न व्यक्तिहरूको खोजी कार्य भइरहेको बताए । संलग्नहरूको पहिचान भइसकेको भए पनि उनीहरू फरार रहेकाले पक्राउ गर्न नसकिएको हो । पार्टी भित्रकै द्वन्दको कारण आक्रमण भएको हुन सक्ने अनुमान छ ।
यसैविच पार्टीका नेतामाथि लक्षित गरी भएको आक्रमणप्रति राष्ट्रिय स्वतन्त्र पार्टी (रास्वपा) पर्साका सभापति तथा पर्सा निर्वाचन क्षेत्र नं. १ का सांसद बद्धिप्रसाद पन्तले कडा निन्दा गरेका छन् । उनले प्रहरीले तत्काल दोषीहरूलाई पक्राउ गरी कानुनी कारबाहीको दायरामा ल्याउनुपर्नेमा जोड दिएका छन् । 
प्रतिक्रिया दिनुहोस् !