वीरगंज (पर्सा), १ जेठ । मधेश प्रदेशका साना तथा मझौला उद्यमलाई डिजिटल माध्यममार्फत व्यवसाय प्रवर्द्धन र बजार पहुँच विस्तारमा सहयोग पुर्याउने उद्देश्यसहित हेल्भेटास नेपाल द्वारा आयोजित “डिजिटल व्यवसाय सेवासम्बन्धी साना तथा मझौला उद्यम सशक्तीकरण-मधेश प्रदेश” कार्यक्रमको पहिलो सत्र सम्पन्न भएको छ ।
होटल हिमाल मा आयोजित कार्यक्रममा “ब्रान्डको डिजिटल उपस्थिति सम्बन्धी अभिमुखीकरण” विषयमा सहभागी उद्यमीहरूलाई डिजिटल प्लेटफर्ममार्फत व्यवसाय विस्तार गर्ने विभिन्न उपायबारे जानकारी दिइएको थियो । कार्यक्रममा सामाजिक सञ्जालको प्रभावकारी प्रयोग, डिजिटल ब्रान्डिङ तथा अनलाइन बजार विस्तारका विषयमा प्रशिक्षण प्रदान गरिएको आयोजकले जनाएको छ ।
कार्यक्रममा हेल्भेटास नेपाल अन्तर्गतको आईएन इलाम परियोजनाका टोली प्रमुख सन्दीप पौडेलले सहजीकरण गर्दै डिजिटल माध्यम प्रयोग गरी व्यवसायलाई प्रतिस्पर्धात्मक, प्रभावकारी र बजारमुखी बनाउन सकिने विषयमा प्रशिक्षण दिएका थिए ।
मधेश प्रदेशका विभिन्न क्षेत्रसँग सम्बन्धित २० वटा कम्पनीका प्रतिनिधिसहित कुल ३० जनाको सहभागिता रहेको कार्यक्रममा स्थानीय उद्यमी, नवप्रवर्तन व्यवसाय प्रतिनिधि तथा व्यवसायीहरूको उल्लेखनीय उपस्थिति रहेको जनाइएको छ ।
कार्यक्रममा डिजिटल साझेदारको रूपमा अष्टा ट्राइब प्रालि, कार्यक्रम साझेदारका रूपमा नेक्स्ट जेन इभेन्ट्स प्रालि तथा सहयोगी साझेदारका रूपमा हेल्भेटास नेपाल को सहभागिता रहेको थियो ।
कार्यक्रममा बोल्दै आयोजकहरूले वर्तमान प्रतिस्पर्धात्मक बजारमा साना तथा मझौला उद्यमका लागि डिजिटल प्लेटफर्मको प्रयोग अपरिहार्य बन्दै गएको उल्लेख गरेका थिए । डिजिटल माध्यममार्फत स्थानीय उत्पादन तथा सेवाहरूलाई राष्ट्रिय बजारसम्म विस्तार गर्न सकिने र यसले व्यवसायको दीर्घकालीन वृद्धिमा समेत टेवा पुग्ने विषयमा छलफल गरिएको थियो ।
आयोजकका अनुसार यस पहलमार्फत मधेश प्रदेशका साना तथा मझौला उद्यमलाई डिजिटल रूपान्तरणतर्फ उन्मुख गराउँदै उनीहरूको व्यवसायिक क्षमता अभिवृद्धि तथा बजार पहुँच विस्तारमा सहयोग पुर्याइनेछ । आगामी दिनमा पनि यस्ता तालिम, डिजिटल सहयोग कार्यक्रम तथा उद्यम विकाससम्बन्धी विविध पहललाई निरन्तरता दिइने जनाइएको छ । 
प्रतिक्रिया दिनुहोस् !