राजविराज (सप्तरी), ३१ वैशाख । सप्तरी जिल्ला प्रहरीले विभिन्न तीन वटा मुद्दामा संलग्न रहेको आरोपमा तीन जनालाई पक्राउ गरेको छ । पक्राउ परेकामाथि अभद्र व्यवहार, आत्महत्या दुरुत्साहन तथा लागुऔषधसम्बन्धी मुद्दाका आरोप रहेको प्रहरीले जनाएको छ ।
अभद्र व्यवहार मुद्दामा राजविराज नगरपालिका–६ निवासी ४३ वर्षीय फिरोजलाई पक्राउ गरिएको प्रहरीले जनाएको छ । उनले २०८३ वैशाख ९ गते राजविराज–७ स्थित एक सिटी सप अगाडि चप्पल–बक्सामाथि मोटरसाइकल चढाएको विषयमा विवाद हुँदा गालीगलौज तथा कुटपिट गरेको आरोप छ ।
यस्तै आत्महत्या दुरुत्साहन मुद्दामा गणेशमान चारनाथ नगरपालिका–८ निवासी २३ वर्षीय अमितकुमार यादव पक्राउ परेका छन् । २०८२ चैत १४ गते तिलाठी कोइलाडी गाउँपालिका–४ निवासी मनिषाकुमारी मण्डलले विषादी सेवन गरेपछि उपचारका क्रममा सोही दिन उनको मृत्यु भएको थियो ।
यादवले टिकटक लाइभमार्फत अश्लील तथा अपमानजनक गालीगलौज गरेको भिडियो सार्वजनिक गरेको कारण मानसिक तनावमा परी मण्डलले विषादी सेवन गरेको भन्दै चन्दनकुमार मण्डल धानुकले जाहेरी दिएको थियो ।
त्यसैगरी लागुऔषध मुद्दामा कञ्चनरुप नगरपालिका–९ निवासी ३१ वर्षीया मनिरेखा कुमारी यादवलाई पक्राउ गरिएको छ । उनको साथबाट ३.३२ ग्राम ब्राउन सुगर र १६२.२ ग्राम गाँजा बरामद गरिएको प्रहरीले जनाएको छ । 
प्रतिक्रिया दिनुहोस् !