चन्द्रपुर (रौतहट), ३१ वैशाख । रौतहटको चन्द्रपुर नगरपालिका अन्तर्गत जुडीबेला चोक नजिक पूर्व–पश्चिम राजमार्ग छेउमा एक युवक मृत अवस्थामा फेला परेका छन् । जिल्ला प्रहरी कार्यालय रौतहटका अनुसार आज बिहान सडकमा एक पुरुष लडिरहेको अवस्थामा देखिएको सूचना इलाका प्रहरी कार्यालय चन्द्रनिगाहपुरमा प्राप्त भएको थियो । त्यसपछि घटनास्थलमा पुगेको प्रहरी टोलीले उनलाई मृत अवस्थामा फेला पारेको जनाएको छ ।
मृतक माधवनारायण नगरपालिका नगरपालिका १ दिपही निवासी २१ वर्षीय रन्जय कुमार यादवका रहेको प्रहरीले जनाएको छ । मृतकको पहिचान परिवारका सदस्यहरूले पुष्टि गरेका हुन् । प्रारम्भिक अनुसन्धानमा मृतकको शरीरमा कुनै बाह्य चोटपटक नदेखिएको तथा उनी मादक पदार्थ सेवन गरेको अवस्थामा रहेको हुन सक्ने प्रहरीको अनुमान छ । प्रहरीले घटनाको थप अनुसन्धान अघि बढाएको छ ।
यसैबिच यात्रुवाहक बसको ठक्करबाट सर्लाहीको हरिवनमा एक पुरुषको मृत्यु भएको छ । उदयपुरको गाईघाटबाट काठमाडौंतर्फ जाँदै गरेको बा.प्र.–०१–००६ ख ९६७० नम्बरको बसले बिहीबार बिहान हरिवन नगरपालिका–११, कडरिया चोकमा ठक्कर दिएको थियो । ठक्करबाट नाम, थर वतन नखुलेका एक पुरुषको मृत्यु भएको इलाका प्रहरी कार्यालय कर्मैयाले जनाएको छ । जिल्ला प्रहरी कार्यालयका प्रवक्ता एवं डीएसपी सरोज राईका अनुसार, बसको ठक्करबाट पुरुषको घटनास्थलमै मृत्यु भएको प्रहरीले जनाएको हो । 
प्रतिक्रिया दिनुहोस् !