वीरगंज (पर्सा), ३१ वैशाख । नेपाली नागरिकलाई अवैधरूपमा क्यासिनो प्रवेश गराई जुवा खेलाइँदै आएको गुनासो बढ्न थालेपछि सरकारले पर्सासहित देशका विभिन्न जिल्लामा कडा निगरानी गर्न निर्देशन दिएको छ । पर्यटन विभागले जिल्ला प्रशासन कार्यालयहरूलाई क्यासिनोमाथि सूक्ष्म निगरानी र स्थलगत अनुगमन तीव्र बनाउन परिपत्र जारी गरेको हो ।
संस्कृति, पर्यटन तथा नागरिक उड्डयन मन्त्रालय अन्तर्गतको विभागले बुधबार जारी गरेको निर्देशनमा प्रचलित कानुनविपरीत नेपाली नागरिकलाई क्यासिनोमा प्रवेश गराउन नदिन विशेष सतर्कता अपनाउन आग्रह गरिएको छ । पछिल्लो समय केही क्यासिनोहरूले नेपालीलाई खुला रूपमा प्रवेश गराई जुवा खेलाउने तथा इजाजतपत्रमा उल्लेख नभएका अवैध खेल सञ्चालन गरिरहेको गुनासो आएपछि विभाग सक्रिय बनेको हो । गत शनिबार राति वीरगंज का विभिन्न क्यासिनोमा प्रहरीले छापामारी गर्दा ६ जना नियन्त्रणमा परेका थिए । त्यसपछि क्यासिनो सञ्चालनमाथि निगरानी कमजोर भएको प्रश्न उठ्न थालेको थियो ।
यसैबीच मंगलबार संघीय संसद्को प्रतिनिधिसभा बैठकमा रहबर अंसारीले नेपालीहरू निर्वाध रूपमा क्यासिनो प्रवेश गरिरहेको विषय संसद्मा उठाएका थिए । उनले विशेषगरी सिमरा क्षेत्रका क्यासिनोमा दैनिक नेपाली युवाहरू पुगिरहेको भन्दै सरकारको ध्यानाकर्षण गराएका थिए । पर्यटन विभागका निर्देशक हिमाल गौतमद्वारा हस्ताक्षरित निर्देशनात्मक पत्र पर्सासहित बारा, झापा, मोरङ, भक्तपुर, काठमाडौं, कास्की, रुपन्देही, कपिलवस्तु, बाँके, कैलाली र कञ्चनपुरका जिल्ला प्रशासन कार्यालयमा पठाइएको छ ।
पर्यटन ऐन, २०३५ तथा क्यासिनो नियमावली, २०८२ अनुसार नेपाली नागरिकलाई क्यासिनोमा प्रवेश गरी खेल खेल्न पूर्ण प्रतिबन्ध रहेको विभागले स्मरण गराएको छ । त्यस्तै, क्यासिनो सञ्चालकहरूले सम्पत्ति शुद्धीकरण निवारण ऐन, २०६४ र नियमावली २०८१ लगायतका कानुनी व्यवस्थाको पूर्ण पालना गर्नुपर्ने पनि विभागले स्पष्ट पारेको छ ।
विभागले जिल्ला प्रशासन कार्यालयहरूलाई कानुनविपरीत नेपालीको प्रवेश, अवैध खेल सञ्चालन वा अन्य शंकास्पद गतिविधि फेला परे तत्काल कानुनी कारबाही गरी विभागलाई जानकारी गराउन समेत निर्देशन दिएको छ ।
प्रतिक्रिया दिनुहोस् !