वीरगंज (पर्सा), २८ वैशाख । औद्योगिक तथा व्यापारिक जिल्ला पर्सा र बारा जिल्लामा राष्ट्रिय औद्योगिक गणना सञ्चालन गरिने भएको छ । ‘अर्थतन्त्रको मापनका लागि आर्थिक गणना’ भन्ने नारासहित सञ्चालन हुन लागेको उक्त गणनाअन्तर्गत विभिन्न उद्योग, व्यापार व्यवसाय तथा सेवा क्षेत्रसँग सम्बन्धित तथ्याङ्क सङ्कलन गरिने जनाइएको छ ।
राष्ट्रिय तथ्याङ्क कार्यालयअन्तर्गत जिल्ला आर्थिक गणना कार्यालय पर्साले विसं २०८३ वैशाख २ गतेदेखि असार ७ गतेसम्म गणक परिचालन गरी तथ्याङ्क सङ्कलन गर्ने तयारी गरेको हो । पर्साका सहायक प्रमुख जिल्ला अधिकारी विनोदकुमार पोखरेलले आर्थिक गणना सफल बनाउन सम्बन्धित सबै निकायलाई आवश्यक समन्वय र सहजीकरण गर्न आग्रह गरेका छन् ।
उनका अनुसार गणनाका क्रममा उद्योग, व्यापारिक प्रतिष्ठान, शैक्षिक संस्था, स्वास्थ्य संस्था, बैंक तथा वित्तीय संस्था, सेवा प्रदायक सङ्घसंस्था तथा अन्य कार्यालयहरूबाट विवरण सङ्कलन गरिनेछ । सहायक प्रमुख जिल्ला अधिकारी पोखरेलले व्यवसाय तथा प्रतिष्ठानका गतिविधिसम्बन्धी सही र पूर्ण विवरण उपलब्ध गराई राष्ट्रिय आर्थिक गणना सफल बनाउन सबै सरोकारवालासँग सहयोगको अपिल गरे ।
आर्थिक गणनामा दर्ता भएका वा नभएका, स्थायी वा अस्थायी प्रकृतिका सबै प्रकारका आर्थिक गतिविधि सञ्चालन गर्ने प्रतिष्ठान तथा व्यवसाय समावेश हुन सक्ने जनाइएको छ । 
प्रतिक्रिया दिनुहोस् !