वीरगंज (पर्सा), २८ वैशाख । जिल्ला प्रशासन कार्यालय पर्सा ले निजी विद्यालय र पुस्तक तथा पोशाक पसलबीचको मिलेमतोमार्फत भइरहेको आर्थिक शोषणप्रति गम्भीर चासो व्यक्त गर्दै यस्ता गतिविधि तत्काल बन्द गर्न चेतावनी दिएको छ ।
कार्यालयले सार्वजनिक सूचना जारी गर्दै विद्यार्थी तथा अभिभावकलाई निश्चित पसलबाट मात्रै पाठ्यपुस्तक र विद्यालय पोशाक खरिद गर्न बाध्य पार्ने कार्य कानूनविपरीत भएको स्पष्ट पारेको हो । सूचनामा कतिपय निजी विद्यालयहरूले अभिभावकलाई अन्य पसलबाट सामान खरिद गर्न नदिई सीमित पसलमै किन्न दबाब दिने गरेको र उपभोक्ताले पाउनुपर्ने छुटसमेत रोक्दै विद्यालय प्रशासन तथा व्यवसायीबीच गैरकानूनी आर्थिक लाभको लेनदेन भइरहेकोबारे गुनासो प्राप्त भएको उल्लेख गरिएको छ ।
सहायक प्रमुख जिल्ला अधिकारी कृष्ण थापा द्वारा जारी सूचनामा यस्ता सिन्डिकेट, एकाधिकार तथा आर्थिक शोषणजन्य गतिविधि तत्काल रोक्न निर्देशन दिइएको छ । चेतावनी अवज्ञा गरे सम्बन्धित विद्यालय र पसलमाथि प्रचलित ऐन तथा कानूनअनुसार कडा कानुनी कारवाही गरिने प्रशासनले जनाएको छ । प्रशासनले अभिभावक तथा सरोकारवालालाई यदि कुनै विद्यालयले निश्चित पसलबाट मात्रै किताब वा पोशाक खरिद गर्न दबाब दिएको प्रमाण, बिल वा अन्य आधार भए कार्यालयमा उजुरी दिन आग्रह गरेको छ ।
वीरगंजका अधिकांश निजी विद्यालयहरूले सीमित पुस्तक तथा कपडा पसलसँग मात्रै कारोबार गर्दै आएको आरोप लामो समयदेखि लाग्दै आएको छ । ती पसलहरूले विद्यालयलाई कमिशन उपलब्ध गराउने गरेको अभिभावकहरूको दाबी छ । चर्चित र नाम चलेका विद्यालयसमेत कमिशनको लोभमा निश्चित पसलसँग मात्रै जोडिएको भन्दै अभिभावकहरूले असन्तुष्टि जनाउँदै आएका छन् ।
यस विषयमा विभिन्न सञ्चारमाध्यममा समाचार सार्वजनिक भएपछि प्रशासनको ध्यानाकर्षण भएको बताइएको छ । प्रशासनको पछिल्लो कदमपछि अभिभावकमाथि हुने आर्थिक दबाब कम हुने अपेक्षा गरिएको छ । यसअघि वीरगंज महानगरपालिका शिक्षा महाशाखा ले पनि निजी विद्यालयहरूलाई यस्ता गतिविधिमा संलग्न नहुन चेतावनी दिइसकेको थियो । 
प्रतिक्रिया दिनुहोस् !