वीरगंज (पर्सा), २४ वैशाख । पर्सा जिल्लामा लामो समयदेखि बन्द अवस्थामा रहेका महत्वपूर्ण छोटी भन्सारहरू पुनः सञ्चालनको तयारीमा जुटेका छन् । करिब ३५ वर्षदेखि निष्क्रिय रहेका ठोरी र भिस्वा छोटी भन्सार पुनः सञ्चालनमा ल्याउन प्रक्रिया तीव्र रूपमा अघि बढाइएको बताइएको छ ।
यस पहलमा सांसद टेक बहादुर शाक्यको विशेष सक्रियता रहेको जनाइएको छ । सांसद निर्वाचित भएको छोटो समयमै उनले बन्द भन्सार नाकाहरू पुनः सञ्चालनमा ल्याउने अभियानलाई प्राथमिकतामा राखेका हुन् ।
स्थानीयवासीका अनुसार लामो समयदेखि सेवा बन्द हुँदा सीमा क्षेत्रको व्यापार, आवतजावत तथा रोजगारीमा प्रत्यक्ष असर परेको थियो । अहिले पुनः सञ्चालनको तयारी अघि बढेसँगै स्थानीय व्यवसायी र सर्वसाधारणमा उत्साह बढेको छ ।
ठोरी र भिस्वा भन्सारसँगै वर्षौंदेखि बन्द रहेको जन्किटोला छोटी भन्सारलाई पनि पुनः सञ्चालनमा ल्याउने प्रयास जारी रहेको बताइएको छ । सम्बन्धित निकायहरूसँग आवश्यक समन्वय र प्रशासनिक प्रक्रिया अगाडि बढिरहेको स्रोतले जनाएको छ ।
भन्सार सेवा पुनः सञ्चालन भएपछि सीमावर्ती क्षेत्रको आर्थिक गतिविधि चलायमान हुने, स्थानीय व्यापार विस्तार हुने तथा रोजगारीका अवसर सिर्जना हुने अपेक्षा गरिएको छ । साथै, स्थानीय नागरिकलाई आवतजावत र दैनिक आवश्यक सामग्रीको आपूर्तिमा समेत सहजता पुग्ने विश्वास गरिएको छ ।
क्षेत्रीय विकास र जनताको आवश्यकतालाई केन्द्रमा राखेर अघि बढाइएको यो पहललाई पर्सावासीले सकारात्मक कदमका रूपमा हेरेका छन् । केही समयभित्रै यी छोटी भन्सारहरू पूर्ण रूपमा सञ्चालनमा आउने तयारी भइरहेको बताइएको छ ।
प्रतिक्रिया दिनुहोस् !