वीरगंज (पर्सा), २३ वैशाख । पर्साका विभिन्न स्थानीय तहहरूले सार्वजनिक तथा सरकारी जग्गा अतिक्रमण नियन्त्रण गर्न कडा अभियान सुरु गरेका छन् । धोबिनी, जिराभवानी र पकहाँमैनपुर गाउँपालिकाले छुट्टाछुट्टै सूचना जारी गर्दै अतिक्रमण हटाउन निश्चित समयसीमा तोकेका हुन् ।
धोबिनी गाउँपालिकाले गृहमन्त्रालय तथा जिल्ला प्रशासन कार्यालय पर्साको निर्देशनअनुसार सार्वजनिक, सरकारी, ऐलानी तथा पर्ती जग्गा, सडक, नदी–नाला, विद्यालय, पोखरी, धार्मिक स्थल र खुला क्षेत्रहरूमा भएको अतिक्रमण हटाउने प्रक्रिया अघि बढाउने जनाएको छ । गाउँपालिकाले ३५ दिनभित्र स्वेच्छाले अतिक्रमण हटाउन आग्रह गर्दै अन्यथा कानुनी कारबाहीसहित हटाउने र त्यसको खर्चसमेत अतिक्रमणकर्ताबाटै असुल गरिने स्पष्ट पारेको छ ।
यसैगरी, जिराभवानी गाउँपालिकाले सार्वजनिक तथा ऐलानी जमिनमा निर्माण गरिएका संरचना १५ दिनभित्र हटाउन निर्देशन दिएको छ। तोकिएको समयसीमा उल्लंघन गरेमा कानुनअनुसार कारबाही गरिने चेतावनीसमेत दिइएको छ ।
पकहाँमैनपुर गाउँपालिकाले पनि मन्त्रिपरिषद्बाट स्वीकृत शासकीय सुधार कार्ययोजनाअनुसार सार्वजनिक तथा सरकारी सम्पत्तिको संरक्षण अभियानलाई तीव्र बनाउँदै १५ दिनभित्र अतिक्रमण हटाउन आग्रह गरेको छ । समयसीमा नाघेमा गाउँपालिकाले आफैं संरचना हटाउने र त्यसमा लाग्ने खर्च सम्बन्धित व्यक्तिबाट असुल गर्ने जनाएको छ । तीनवटै स्थानीय तहले सार्वजनिक सम्पत्तिको संरक्षणमा सहयोग गर्न सर्वसाधारणसँग आग्रह गर्दै नियमको पालना गर्न अपिल गरेका छन् । 
प्रतिक्रिया दिनुहोस् !