वीरगंज (पर्सा), २३ वैशाख । वीरगंज महानगरपालिकाले शहरको सौन्दर्य अभिवृद्धि र वातावरणीय सुधारलाई प्राथमिकतामा राख्दै बीपी उद्यानलाई व्यवस्थित हरियाली पार्कका रूपमा विकास गर्ने कामलाई तीव्र बनाएको छ । लामो समयदेखि अतिक्रमण र अव्यवस्थाको मारमा परेको उक्त क्षेत्रलाई अब स्वच्छ, खुला र आकर्षक सार्वजनिक स्थलका रूपमा परिणत गर्ने लक्ष्य लिइएको छ ।
हाल उद्यान परिसरमा माटो भर्ने, जमिन सम्याउने तथा नियमित सिँचाइ गर्ने कार्य भइरहेको महानगरपालिकाले जनाएको छ । आगामी चरणमा दुबो रोप्ने, विभिन्न जातका फूल तथा बिरुवा लगाउने र हरियाली व्यवस्थापनलाई थप व्यवस्थित गर्ने योजना रहेको छ, जसले पार्कलाई प्राकृतिक सौन्दर्यले भरिपूर्ण बनाउने अपेक्षा गरिएको छ ।
मेयर राजेशमान सिंहका अनुसार यो योजना केवल पार्क निर्माणमा सीमित नभई समग्र शहरी जीवनस्तर उकास्ने अभियान हो । उनले बीपी उद्यानलाई आधुनिक, सफा र व्यवस्थित हरियाली पार्कका रूपमा विकास गरिने उल्लेख गर्दै यसले शहरको सौन्दर्य बढाउनुका साथै नागरिकलाई स्वच्छ वातावरण र विश्रामका लागि उपयुक्त खुला स्थान उपलब्ध गराउने बताए ।
उनले थपे, ‘पार्क निर्माणले तापक्रम सन्तुलन, प्रदूषण न्यूनीकरण र स्वस्थ जीवनशैली प्रवद्र्धनमा महत्वपूर्ण भूमिका खेल्नेछ ।’ महानगरपालिकाले पार्कभित्र पैदल मार्ग, विश्रामस्थल, फूलबारी तथा हरियाली क्षेत्रको सुव्यवस्थित संरचना निर्माण गर्ने तयारी गरेको छ । साथै, उद्यानको उत्तरतर्फ रहेको पुरानो रेल्वे ट्रयाक क्षेत्रमा रेल्वे संग्रहालय स्थापना गर्ने योजना पनि अघि बढाइएको छ, जहाँ ऐतिहासिक महत्व झल्काउने उद्देश्यले जनकपुरबाट पुरानो रेल इन्जिन ल्याएर राख्ने तयारी भइरहेको छ ।
यसअघि उद्यान क्षेत्रमा अतिक्रमण गरी व्यवसाय सञ्चालन गर्दै आएका व्यापारीहरूलाई वैकल्पिक व्यवस्था स्वरूप छपकैयाँस्थित रेल्वे सडक क्षेत्रमा कृषि बजार स्थापना गरी स्थानान्तरण गरिसकिएको छ । यस कदमले उद्यान क्षेत्रलाई पूर्ण रूपमा खुला र व्यवस्थित बनाउन सहयोग पुगेको महानगरपालिकाले जनाएको छ ।
महानगरपालिकाले यसअघि वीरगंज भन्सार क्षेत्रमा वृक्षारोपण गर्दै हरियाली विस्तारको प्रयास गरिसकेको छ । बीपी उद्यानको विकास सम्पन्न भएपछि वीरगंजमा शहरी सौन्दर्य वृद्धि, वातावरण संरक्षण र आन्तरिक पर्यटन प्रवद्र्धनमा थप टेवा पुग्ने विश्वास लिइएको छ । 
प्रतिक्रिया दिनुहोस् !