वीरगंज (पर्सा), २३ वैशाख । जिल्ला हुलाक कार्यालय पर्साले लोककल्याणकारी विज्ञापन प्रसारणको प्रभावकारिता र मापदण्ड पालनाको अवस्थाबारे अनुगमन अभियानलाई तीव्र बनाएको छ । यही क्रममा पोखरिया स्थित रेडियो पोखरियामा स्थलगत निरीक्षण गरिएको छ ।
रेडियो पोखरियाका प्रबन्ध निर्देशक शम्भु कुमार सुमनका अनुसार विज्ञापन बोर्डमार्फत प्रसारण भइरहेका लोककल्याणकारी सन्देशहरू प्रभावकारी रूपमा प्रसारित भइरहेका छन् कि छैनन् भन्ने विषयमा अनुगमन केन्द्रित गरिएको थियो ।
जिल्ला हुलाक कार्यालय पर्साका प्रमुख नमनाथ यादवको नेतृत्वमा सम्पन्न उक्त अनुगमनमा जिल्ला प्रशासन कार्यालय पर्साका शाखा अधिकृत विनय गुप्ता तथा नेपाल पत्रकार महासंघ पर्साका अध्यक्ष ओमप्रकाश खनाललगायतको सहभागिता रहेको थियो ।
अनुगमन टोलीले सञ्चार माध्यमहरूले विज्ञापन प्रसारण गर्दा अपनाउनुपर्ने मापदण्ड, समय व्यवस्थापन र सामग्रीको गुणस्तरबारे जानकारी लिँदै सम्बन्धित निकायले तोकेको निर्देशिका पालना गर्न सुझाव दिएको जनाएको छ ।
प्रमुख यादवका अनुसार पर्सा जिल्लाभित्र सञ्चालनमा रहेका अन्य रेडियो तथा टेलिभिजन संस्थाहरूमा पनि क्रमिक रूपमा यस्तै स्थलगत अनुगमन जारी रहनेछ । उनले लोककल्याणकारी सन्देश प्रभावकारी ढंगले जनतासम्म पुर्याउने उद्देश्यले यस्तो निगरानीलाई प्राथमिकता दिइएको स्पष्ट पारे ।
प्रतिक्रिया दिनुहोस् !