वीरगंज (पर्सा), २८ चैत । पर्सा, बारा, रौतहट तथा आसपासका जिल्लामा माध्यमिक शिक्षा परीक्षा (एसईई) उत्तीर्ण विद्यार्थी र उनीहरूका अभिभावकलाई लक्षित गर्दै ‘भविष्य मेला’ को दोस्रो संस्करण आगामी वैशाख ५ गते शनिबार वीरगंजमा आयोजना हुने भएको छ । वीरगंजस्थित सिद्धार्थ दियालो होटलमा बिहान ९ बजेदेखि साँझ ६ बजेसम्म सञ्चालन हुने एकदिने शैक्षिक तथा करियर मेला ‘एड्स बी मिडिया’ को आयोजनामा हुन लागेको हो ।
पहिलो संस्करणको सफलतापछि यसपटक मेलालाई अझ विस्तृत, व्यवस्थित र प्रभावकारी बनाउने तयारी गरिएको आयोजकले जनाएको छ । आयोजकका अनुसार यस वर्षको मेलामा आठ हजारभन्दा बढी विद्यार्थी तथा अभिभावकको सहभागिता रहने अपेक्षा गरिएको छ । कार्यक्रम निर्देशक नवीन कार्कीले ‘भविष्य मेला’ केवल शैक्षिक प्रदर्शनी नभई विद्यार्थीको शैक्षिक, व्यावसायिक र व्यक्तिगत भविष्य निर्माण गर्ने परिवर्तनकारी प्लेटफर्म भएको बताए ।
उनका अनुसार मेलाको मुख्य उद्देश्य ग्रामीण तथा शहरी क्षेत्रका विद्यार्थीलाई विज्ञान, व्यवस्थापन, कानुन, पत्रकारिता, इन्जिनियरिङ, चिकित्सा र प्राविधिक शिक्षालगायत विभिन्न शैक्षिक धारबारे विस्तृत जानकारी प्रदान गर्नु हो । साथै, विद्यार्थीलाई आफ्नो रुचि, क्षमता र आर्थिक अवस्थाअनुसार उपयुक्त शैक्षिक मार्ग छनोट गर्न सहयोग गर्ने लक्ष्य राखिएको छ ।
मेलामा निःशुल्क करियर काउन्सिलिङ, छात्रवृत्ति जानकारी, तथा विभिन्न शैक्षिक संस्थासँग प्रत्यक्ष अन्तरक्रियाको अवसर उपलब्ध गराइनेछ । ग्रामीण तथा विपन्न वर्गका विद्यार्थीलाई लक्षित गर्दै मेरिट तथा आवश्यकतामा आधारित छात्रवृत्ति, किफायती अध्ययन विकल्प र वित्तीय सहायता सम्बन्धी जानकारीसमेत प्रदान गरिनेछ ।
पहिलो संस्करण गत वर्ष वीरगंज नगर सभागृह (टाउन हल) मा सम्पन्न भएको थियो, जसमा पर्सा, बारा, रौतहटसहित १० जिल्लाबाट पाँच हजारभन्दा बढी विद्यार्थी सहभागी भएका थिए । उक्त मेलामा २८ वटा कलेजले स्टल राख्दै शैक्षिक परामर्श, छात्रवृत्ति र करियर अवसरबारे जानकारी दिएका थिए ।
दोस्रो संस्करणमा सहभागी विद्यार्थीका लागि आकर्षक पुरस्कारको व्यवस्था पनि गरिएको छ । एकजना विद्यार्थीले मोबाइल फोन, पाँच जनाले एयरबड्स तथा १० जनाले पावर बैंक, हाते घडी लगायतका उपहार जित्ने अवसर पाउनेछन् ।
मेलामा निःशुल्क बैंक खाता, डिम्याट खाता, आँखा जाँच शिविर तथा सिम कार्ड वितरण जस्ता सेवा पनि उपलब्ध हुनेछन् । यसले विद्यार्थीमा वित्तीय साक्षरता अभिवृद्धि गर्न सहयोग पुग्ने आयोजकको विश्वास छ । साथै, मेलामा सहभागी शैक्षिक संस्थाहरूले आफ्ना कार्यक्रम, पूर्वाधार, छात्रवृत्ति योजना, अन्तर्राष्ट्रिय अवसर तथा उद्योगसँगको सहकार्यबारे प्रस्तुति दिने अवसर पाउनेछन् ।
वीरगंज महानगरपालिका, विभिन्न शैक्षिक संगठन तथा उद्योग वाणिज्य संघको सहकार्यले कार्यक्रमलाई थप प्रभावकारी बनाउने अपेक्षा गरिएको छ । आयोजक नवीन कार्कीले दोस्रो संस्करणलाई अझ भव्य र परिणाममुखी बनाउने प्रतिबद्धता जनाउँदै ‘भविष्य मेला’ नेपाली युवाको शैक्षिक भविष्य निर्माण गर्ने महत्वपूर्ण मञ्च बन्ने विश्वास व्यक्त गरेका छन् । 
प्रतिक्रिया दिनुहोस् !