बर्दिवास (महोत्तरी), १६ चैत । महोत्तरीको बर्दिवासमा प्रस्तावित मेडिकल कलेज पूर्वाधार निर्माण विकास आयोजना खारेज गर्ने चर्चा चुलिएपछि नागरिक समाज आन्दोलनमा उत्रिएको छ । सोमबार केही समयका लागि पूर्व–पश्चिम राजमार्ग अवरुद्ध गर्दै नागरिक समाजले विरोध प्रदर्शन गरेका थिए ।
प्रदर्शनपछि उनीहरूले जिल्ला प्रशासन कार्यालय महोत्तरी मार्फत इलाका प्रशासन कार्यालय बर्दिवासमा ध्यानाकर्षण पत्र बुझाएका छन् । ध्यानाकर्षण पत्रमा बर्दिवास मेडिकल कलेज आयोजना खारेज गर्ने सम्बन्धमा सञ्चारमाध्यममा आएका समाचारप्रति गम्भीर आपत्ति जनाइएको छ ।
‘एक प्रदेश एक मेडिकल कलेज’ को अवधारणाअनुसार २०७६ सालमा स्थापना गरिएको उक्त आयोजनाले हालसम्म विभिन्न प्रक्रियागत कामहरू पूरा गरिसकेको छ । मन्त्रिपरिषद्को २०८०/१०/०३ को निर्णयअनुसार जग्गा प्राप्त भइसकेको, १३.७४ हेक्टर क्षेत्रमा करिब १९ हजारभन्दा बढी बिरुवा रोपण भइसकेको तथा विस्तृत परियोजना प्रतिवेदन (डि.पि.आर.) समेत स्वीकृत भइसकेको अवस्थामा आयोजना खारेज गर्ने प्रयासप्रति आपत्ति जनाइएको हो ।
नागरिक समाजले स्वास्थ्य सेवा र शिक्षा विस्तारका लागि अत्यन्तै महत्वपूर्ण मानिएको यस आयोजनालाई कुनै पनि बहानामा रोक्न खोजिए थप सशक्त आन्दोलन गर्ने चेतावनीसमेत दिएको छ । 
प्रतिक्रिया दिनुहोस् !