कलैया (बारा), १७ चैत । कक्षा ८ को पालिका स्तरीय परिक्षामा अमर्यादित व्यवहार गरेको अभियोगमा बाराको विश्रामपुर गाउँपालिका स्थित नेरामावि बलिरामपुरका एक परिक्षार्थी एक बर्षका लागि रेष्टीकेटमा परेका छन् । यसरी रेष्टीकेटमा पर्ने छात्र शिवचन्द्रप्रसाद यादव, सो पालिका वडा नं. ३ का वडाअध्यक्ष समेत रहेको विश्रमपुर गाउँपालिका शिक्षा शाखाले जनाएको छ ।
विश्रामपुर गाउँपालिका वडा नं. ३ का वडाअध्यक्ष यादव सोही पालिकाको वडा नं. ४ स्थित नेरामावि बलिरामपुर परिक्षा केन्द्रमा, यस बर्ष कक्षा आठको परिक्षार्थी थिए । परिक्षा सुरु भए देखिनै परिक्षार्थी यादवले पद र पहुँचको धाक देखाउँदै, परिक्षा केन्द्रमा अमर्यादित व्यवहार गरेको कुरा, परिक्षा केन्द्रले पालिका शिक्षा शाखालाई लेखेको पत्रमा उल्लेख छ । वडाअध्यक्ष यादवले आफ्नो सटटामा परिक्षा दिन अरुलाई बसाउने, अरु परिक्षार्थीको उत्तर पुस्तिका फेरबदल गर्नेलगायत, परिक्षाको मर्यादा विपरित हर्कत गरेको, सो परिक्षा केन्द्रका निरिक्षकहरूले बताएका छन् ।
परिक्षा केन्द्रले पठाएको कारवाही पत्रको आधारमा गाउँपालिका शिक्षा शाखाले, परिक्षार्थी यादवको सम्पुर्ण उत्तर पुस्तिका रद्ध गर्दै, एक बर्ष परिक्षा दिन नपाउने गरि रेष्टीकेट गरेको विश्रमपुर गाउँपालिका शिक्षा शाखा प्रमुख महेश रिमालले, सोमबार रेडियो वीरगंजसंगको कुराकानीमा बताएका छन् । सो केन्द्रका निरिक्षकहरूलाई पनि परिवर्तन गरि, नयाँ निरिक्षकहरू खटाइएको शिक्षा प्रमुख रिमालले जानकारी गराए ।
प्रतिक्रिया दिनुहोस् !