वीरगंज (पर्सा), १५ चैत । ‘पञ्च परिवर्तन राष्ट्र निर्माणको आधार’ भन्ने मूल नारासहित वीरगंजमा हिन्दू सम्मेलन सम्पन्न भएको छ । विश्व हिन्दू परिषद् नेपाल, वीरगंज महानगर कमिटीको आयोजनामा शनिबार माइस्थान मन्दिरको प्रांगणमा कार्यक्रम आयोजना गरिएको हो ।
कार्यक्रममा बोल्दै विशिष्ट अतिथि तथा विश्व ज्योतिष सम्राट डा. पुरुषोत्तम दुवेले विद्यालय तहबाट नैतिक शिक्षा हटाइँदा समाजमा विभिन्न विकृति बढ्दै गएको टिप्पणी गरे । उनले पञ्च परिवर्तनका आधारभूत पक्षहरू सामाजिक समरसता, कुटुम्ब प्रबोधन, वातावरण संरक्षण, स्वदेशी चेतना र नागरिक कर्तव्य सम्बन्धी शिक्षा नयाँ पुस्ताले पर्याप्त रूपमा नपाइरहेको बताए । आफूहरू नै नैतिक आचरणमा दृढ रहे मात्र आगामी पुस्ताले त्यसलाई अनुकरण गर्ने भएकाले व्यक्तिगत व्यवहार सुधारमा जोड दिनुपर्ने उनको भनाइ थियो ।
त्यसैगरी, प्रमुख अतिथि एवं हिन्दू राष्ट्र स्वाभिमान जागरण पर्साका सदस्य धनन्जय मिश्रले हिन्दू धर्मको सहिष्णुता र उदारतामाथि प्रकाश पारेका थिए । उनले हिन्दू धर्मावलम्बीहरूले आफ्ना धार्मिक ग्रन्थसँगै अन्य धर्मग्रन्थको पनि सम्मान गर्ने परम्परा रहेको उल्लेख गर्दै मन्दिर मात्र होइन, मस्जिद, गुरुद्वारा र गुम्बा जाने संस्कारले हिन्दू धर्मको विशेषता झल्काउने बताए । यस्तो उदारता विश्वका अन्य धर्महरूमा विरलै पाइने दाबी पनि उनले गरे ।
सम्मेलनमा वीरगंजका उद्योगी, व्यवसायी, शिक्षाप्रेमी, सञ्चारकर्मी तथा विभिन्न संघ संस्थाका प्रतिनिधिहरूको उल्लेख्य उपस्थिति रहेको थियो । सहभागीहरूले राष्ट्र निर्माणका लागि आध्यात्मिक चेतना र नैतिक मूल्यहरूको विकास अत्यावश्यक रहेको निष्कर्षमा जोड दिएका थिए । 
प्रतिक्रिया दिनुहोस् !