वीरगंज (पर्सा), १५ चैत । नेकपा एमालेले पार्टी अध्यक्ष केपी शर्मा ओलीको रिहाइको माग गर्दै आइतबार ७७ वटै जिल्ला प्रशासन कार्यालयमा ज्ञापनपत्र बुझाएको छ । पार्टीले सरकारलाई अध्यक्ष ओलीमाथि ‘राजनीतिक पूर्वाग्रहपूर्ण’ कारबाही भएको भन्दै ध्यानाकर्षण गराएको हो ।
यसैक्रममा पर्सा जिल्ला कमिटीले पनि अध्यक्ष ओली र पूर्व गृहमन्त्री रमेश लेखकको पक्राउको विरोध गर्दै जिल्ला प्रशासन कार्यालय पर्सामा ज्ञापनपत्र बुझाएको छ । पर्सा जिल्ला अध्यक्ष डा. विश्वम्भर शर्माको नेतृत्वमा गएको टोलीले प्रमुख जिल्ला अधिकारी भोला दहाललाई ज्ञापनपत्र हस्तान्तरण गरेको थियो ।
ज्ञापनपत्र बुझाउँदै अध्यक्ष शर्माले नेता ओली र लेखकलाई सूर्योदय अघि ‘प्रतिशोधपूर्ण ढंगले’ पक्राउ गरिएको आरोप लगाउँदै तत्काल रिहा गर्न सरकारसँग माग गरेका छन् । उनले साथै सर्वोच्च अदालतका प्रधानन्यायाधीशको नेतृत्वमा छानबिन समिति गठन गर्नुपर्ने आवश्यकता औँल्याए ।
कार्यक्रममा एमाले मधेश प्रदेश उपाध्यक्ष बिचारी यादव, सचिव महेश दास, ओबीसीका राष्ट्रिय अध्यक्ष तेजप्रकाश निषाद, नेता शम्भु गुप्ता, रिमा यादव, मानदेव हजरा लगायत सयौं नेता तथा कार्यकर्ताहरूको सहभागिता रहेको थियो । ज्ञापनपत्र बुझाउनुअघि वीरगंजमा मोटरसाइकल र्याली पनि निकालिएको थियो । नेकपा एमालेका कार्यकर्ताहरु मोटरसाइकल र्याली वीरगंज महानगर परिक्रमा गरि जिल्ला प्रशासन कार्यालय पर्सामा गएर प्रजिअलाई ज्ञापन पत्र बुझाएका थिए ।
पार्टी सचिवालयको बैठकले अध्यक्ष ओलीलाई गौरबहादुर कार्की आयोगको प्रतिवेदनअनुसार दोषी ठहर गरी निवासबाट पक्राउ गरेको घटनाको विरोध स्वरूप देशव्यापी ज्ञापनपत्र अभियान सञ्चालन गर्ने निर्णय गरेको थियो । 
प्रतिक्रिया दिनुहोस् !