काठमाडौँ, १२ चैत । संघीय संसद्मा भाषिक विविधताको उपस्थिति फेरि बलियो रूपमा देखिएको छ । यसपटक प्रतिनिधिसभाका ६३ जना सांसदले नेपाली बाहेक आफ्नै मातृभाषामा शपथ लिने निर्णय गरेका छन् । संघीय संसद् सचिवालयका अनुसार उनीहरूले इमेल तथा प्रत्यक्ष उपस्थित भई यसबारे औपचारिक जानकारी गराएका हुन् ।
नवनिर्वाचित सांसदहरूको पद तथा गोपनीयताको शपथ आज दिउँसो २ बजे सञ्चालन हुँदैछ । शपथ गराउने जिम्मेवारी प्रतिनिधिसभाका ज्येष्ठ सदस्य अर्जुननरसिंह केसी ले सम्हाल्नेछन् । शपथ कार्यक्रमलाई व्यवस्थित बनाउन संघीय संसद् सचिवालयले सांसदहरूलाई आवश्यक कागजातसहित समयभन्दा कम्तीमा दुई घण्टा अगावै उपस्थित हुन निर्देशन दिएको छ । यसमा निर्वाचन आयोगबाट प्राप्त प्रमाणपत्र, नेपाली नागरिकताको प्रतिलिपि तथा हालसालै खिचिएको पासपोर्ट साइजको फोटो अनिवार्य गरिएको छ ।
नेपालको संसदीय अभ्यासमा मातृभाषामा शपथ लिने परम्परा विस्तारै बढ्दो क्रममा देखिएको छ । २०६३ सालको अन्तरिम संसद्मा ५८ सांसदले मातृभाषा रोजेका थिए भने २०६४ को संविधानसभामा यो संख्या ह्वात्तै बढेर २६४ पुगेको थियो । त्यसयता २०७० मा ३५, २०७४ मा ४६ र २०७९ मा २८ सांसदले नेपालीबाहेकका भाषामा शपथ लिएका थिए । यसपटक भने ६३ जनाले मातृभाषा रोज्नुले भाषिक पहिचान र समावेशिताप्रति सांसदहरूको झुकाव झनै बलियो भएको संकेत गरेको छ ।
मैथिली, भोजपुरी, मगर, गुरुङ, थारू, नेवारी, तामाङ, लिम्बु, राई, उर्दू, शेर्पा लगायत दर्जनौं भाषामा शपथ लिने तयारी भएको छ । यो प्रवृत्तिले नेपालको बहुभाषिक पहिचानलाई संस्थागत रूपमा स्वीकार गर्ने अभ्यासलाई मजबुत बनाउँदै लैजाने विश्लेषण गरिएको छ । साथै, संसद्भित्र भाषिक समावेशिता बढ्दै जानु लोकतान्त्रिक संस्कृतिको सकारात्मक संकेतका रूपमा हेरिएको छ ।
प्रतिक्रिया दिनुहोस् !