वीरगंज (पर्सा), ३ चैत । पर्साबाट एकजना महिला समानुपातिक प्रणालीमार्फत प्रतिनिधिसभा सदस्यमा निर्वाचित भएकी छन् । राष्ट्रिय स्वतन्त्र पार्टी (रास्वपा) का तर्फबाट पकहाँमैनपुर गाउँपालिका वडा नं. १ धोरेकी ३५ वर्षीया सुनिता कुमारी चौधरी संघीय संसदको प्रतिनिधिसभामा प्रवेश गर्न सफल भएकी हुन् ।
निर्वाचन आयोगले सार्वजनिक गरेको समानुपातिक निर्वाचन परिणामअनुसार चौधरीको नाम निर्वाचित उम्मेदवारहरूको सूचीमा ५४ औँ नम्बरमा समावेश गरिएको छ । आयोगका अनुसार उनी समावेशी समूह अन्तर्गत मधेशी कोटाबाट प्रतिनिधित्व गर्दै संसदमा पुगेकी हुन् ।
रास्वपाले पेश गरेको समानुपातिक बन्दसूचीमा भने चौधरीको नाम १०१ औँ स्थानमा रहेको थियो । तर पार्टीले प्राप्त गरेको मतको आधारमा उनी अन्ततः निर्वाचित हुने सूचीमा पर्न सफल भएकी हुन् । फागुन २१ गते सम्पन्न प्रतिनिधिसभा सदस्य निर्वाचनमा रास्वपाले पर्सामा उल्लेखनीय सफलता हासिल गर्दै एक लाख ३६ हजार ८ सय ९३ मत प्राप्त गरेको थियो ।
सोही मतपरिणामका आधारमा समानुपातिकतर्फ सिट सुनिश्चित हुँदा चौधरी सांसद बन्ने अवसर पाएकी हुन् । यस निर्वाचनमा समानुपातिक प्रणालीबाट पर्साबाट प्रतिनिधित्व गर्ने उनी एकमात्र उम्मेदवार बनेकी छन् । उनको विजयसँगै जिल्लाबाट महिला तथा मधेशी समुदायको प्रतिनिधित्व थप सुदृढ भएको मानिएको छ ।
प्रतिक्रिया दिनुहोस् !