वीरगंज (पर्सा), २ चैत । वीरगंज महानगरपालिकाले बहाल कर संकलन, करको दायरा विस्तार, स्थानीय तहबाटै प्यान नम्बर जारी गर्नेलगायतका विषयमा सरोकारवालासँग छलफल गरेको छ ।
महानगर प्रमुख राजेशमान सिंहको अध्यक्षतामा बसेको बैठकमा बहाल कर संकलनलाई प्रभावकारी बनाउने र कर प्रशासनलाई व्यवस्थित गर्ने विषयमा विस्तृत छलफल गरिएको वीरगंज महानगरपालिकाले जनाएको छ । महानगर प्रमुख सिंहले बहाल कर संकलन गर्ने एकल अधिकार स्थानीय सरकारको भए पनि उक्त कर हाल संघीय सरकार मातहत रहेको आन्तरिक राजश्व कार्यालयमा जम्मा हुने कारण स्थानीय तहको राजश्व गुमिरहेको बताए ।
उनले संविधानले स्थानीय तहलाई दिएको अधिकारअनुसार बहाल कर महानगरपालिकामै बुझाउने व्यवस्था लागू गर्न सबै पक्षको सहयोग हुनु पर्ने बताए । बैठकमा आन्तरिक राजश्व कार्यालय वीरगञ्जका प्रमुख कर अधिकृत टिकाराज चौलागाई, आन्तरिक राजश्व कार्यालयका प्रतिनिधि, लेखा परीक्षक, लेखा व्यवसायी तथा स्थानीय व्यवसायीहरूको सहभागिता थियो ।
सहभागीहरूले कर प्रणालीलाई सरल, पारदर्शी र सेवा–मैत्री बनाउन स्थानीय तह, कर कार्यालय र व्यवसायीबीच सहकार्य आवश्यक रहेको धारणा व्यक्त गर्दै कर सचेतना कार्यक्रमको आवश्यकता औँल्याएका थिए ।
प्रतिक्रिया दिनुहोस् !