वीरगंज (पर्सा), ३० फागुन । नेपाली कांग्रेस पर्सा क्षेत्र नम्बर–४ को प्रतिनिधिसभा निर्वाचन २०८२ को समीक्षा बैठक शनिबार सम्पन्न भएको छ । जगरनाथपुर गाउँपालिका–५ मसिहानी धर्मपुरमा आयोजित उक्त बैठकमा बोल्दै पूर्वमन्त्री तथा सो निर्वाचनका कांग्रेस उम्मेदवार रमेश रिजालले आगामी दिनमा कुनैपनि निर्वाचनमा उम्मेदवारी नदिने घोषणा गरेका छन् ।
निर्वाचनकै क्रममा गरेको प्रतिबद्धता स्मरण गराउँदै रिजालले अब आफू प्रत्यक्ष चुनावी प्रतिस्पर्धाबाट बाहिर रहने स्पष्ट पारे । फागुन २१ गते सम्पन्न प्रतिनिधिसभा निर्वाचनमा पर्सा–४ मा कांग्रेसले भोगेको पराजयको समीक्षा गर्न आयोजित क्षेत्रीय अगुवा तथा कार्यकर्ता भेलामा उनले यस्तो घोषणा गरेका हुन् ।
‘आजबाट म कुनै पनि चुनाव लड्दिनँ,’ रिजालले भने, ‘अबको नेतृत्व युवाले लिनुपर्छ, म उनीहरूलाई साथ र सहयोग गर्नेछु ।’ उनले चुनाव नलडेपनि क्षेत्रका जनताको सेवा र विकासका काममा निरन्तर सक्रिय रहने प्रतिबद्धता व्यक्त गरे ।
उनले निर्वाचनमा आफू तथा कांग्रेसलाई मत दिने मतदाताप्रति कृतज्ञता व्यक्त गर्दै परिवर्तनको लहरमा अन्य दल वा उम्मेदवारलाई मत दिएका कांग्रेस समर्थकप्रति कुनै असन्तुष्टि नरहेको बताए । पार्टी एकताको आवश्यकता औँल्याउँदै उनले सबैलाई पुनः कांग्रेसमा सक्रिय हुन आग्रह गरे । ‘जनताको निर्णयलाई सम्मान गर्नुपर्छ,’ रिजालले भने, ‘जनताको दुःख–सुखमा साथ दिने पार्टी कांग्रेस नै हो, त्यसैले सबै साथीहरूलाई पार्टीमा फर्किन आग्रह गर्छु ।’
कांग्रेस पर्सा क्षेत्रीय सभापति श्रीकान्त प्रसाद यादवको अध्यक्षतामा सम्पन्न बैठकमा मधेश प्रदेशका वनमन्त्री शंकर चौधरी, कांग्रेस मधेश प्रदेश महामन्त्री बृहस्पतिकृष्ण श्रेष्ठ, कांग्रेस पर्साका प्रवक्ता रमेश पाण्डे, जिल्ला सह–सचिव नविन सिंह, नेता बशिष्ठ नारायण कुर्मी, क्षेत्रीय सचिव बलिष्टर अहमदलगायत नेताहरूको उपस्थिति रहेको थियो ।
क्षेत्रीय कार्यसमितिको आयोजनामा सम्पन्न समीक्षा भेलामा महाधिवेशन प्रतिनिधि, महासमिति सदस्य, जिल्ला तथा प्रदेश कार्यसमितिका पदाधिकारी, गाउँपालिका र वडा स्तरका नेता–कार्यकर्ता, बुथ सभापति, निर्वाचित जनप्रतिनिधि तथा भ्रातृ संगठनका प्रतिनिधिहरूको उल्लेख्य सहभागिता थियो । भेलामा पर्सा क्षेत्र नम्बर–४ मा कांग्रेसको हारका कारणबारे पनि विस्तृत छलफल गरिएको बताइएको छ ।
प्रतिक्रिया दिनुहोस् !