पर्सामा जसपा कमजोरः लालबाबुको पैत्रिक गाउँमा ‘छाता’लाई १३ मत

वीरगंज (पर्सा), २७ फागुन । जनता समाजवादी पार्टी (जसपा) नेपाल का महासचिव तथा मधेश प्रदेश का पूर्व मुख्यमन्त्री लालबाबु राउतको पैत्रिक गाउँमा पार्टीको चुनाव चिह्न ‘छाता’ले अत्यन्त कम मत प्राप्त गरेको तथ्य सार्वजनिक भएको छ । जगरनाथपुर गाउँपालिका–४, जगरनाथपुरस्थित मतदान केन्द्रमा मात्र छाताको पक्षमा १३ मत खसेको छ । आफ्नै गाउँमा समेत न्यून मत पर्नुले पर्सा जिल्लामा गद्दीको जनाधार कमजोर हुँदै गएको चर्चा राजनीतिक विश्लेषकहरूमा शुरू भएको छ ।

त्यस्तै, राउत बसोबास गर्दै आएका वीरगंज महानगरपालिका–१३ मा पनि छाताले मात्र ३९ मत प्राप्त गरेको छ । कमजोर मत परिणामका कारण पर्साका विभिन्न निर्वाचन क्षेत्रमा जसपा नेपालका उम्मेदवारहरूको जमानत जफत भएको विवरण सार्वजनिक भएको छ । पर्सा जिल्ला पहिले मधेशी मोर्चा तथा उपेन्द्र यादव नेतृत्वको जसपा नेपालका लागि बलियो आधार क्षेत्र मानिन्थ्यो । तर पछिल्लो समय पार्टीभित्रको आन्तरिक विवाद, नेतृत्वप्रति असन्तुष्टि र प्रभावशाली नेताहरू अन्य दलमा प्रवेश गरेपछि जिल्लामा जसपा कमजोर हुँदै गएको विश्लेषण गरिएको छ ।

२०८२ फागुन २१ गते सम्पन्न प्रतिनिधिसभा सदस्य निर्वाचनको देशव्यापी मत परिणामअनुसार पर्साका चारै निर्वाचन क्षेत्रमा जसपा नेपालका उम्मेदवारहरूको जमानत जफत भएको छ । यस नतिजापछि पार्टीभित्रका केही युवा नेताहरूले जिल्लामा देखिएको कमजोर प्रदर्शनको मुख्य जिम्मेवारी लालबाबु राउत र अध्यक्ष उपेन्द्र यादवमाथि पर्ने आरोप लगाएका छन् । उनीहरूले जनाधार भएका नेताहरूलाई पार्टीभित्र टिक्न नदिने वातावरण सिर्जना भएको र केन्द्रीय नेतृत्वलाई वास्तविक अवस्थाबारे गलत जानकारी दिइएको दाबी गरेका छन् ।

निर्वाचनमा अधिकांश क्षेत्रका उम्मेदवारहरूको जमानत जफत भएपछि पार्टीभित्र नेतृत्वको नैतिक जिम्मेवारी र राजीनामाको माग उठ्न थालेको स्रोतहरूले जनाएका छन् । यसपटकको निर्वाचनमा नयाँ राजनीतिक समीकरण र विशेषगरी राष्ट्रिय स्वतन्त्र पार्टीको बढ्दो प्रभावका कारण पर्सामा ‘छाता’को प्रभाव घटेको विश्लेषण भएपनि पार्टीभित्रका केही नेताहरूले गद्दी र अध्यक्ष उपेन्द्र यादवकै नेतृत्व कारण जसपा कमजोर भएको टिप्पणी गरेका छन् ।