वीरगंज (पर्सा), २७ फागुन । पर्सा प्रतिनिधिसभा निर्वाचन क्षेत्र नम्बर–१ बाट नेपाल कम्युनिस्ट पार्टी (एमाले) का उम्मेदवार बनेका पूर्वमन्त्री प्रदीप यादवले आफूले निर्वाचन अभियानका क्रममा गरेको खर्चको विवरण निर्वाचन कार्यालयमा बुझाएका छन् ।
बुधबार आफ्ना निर्वाचन प्रतिनिधि जन्नत अन्सारी मार्फत यादवले खर्च विवरण निर्वाचन कार्यालय पर्सामा पेश गरेका हुन् । प्रस्तुत विवरणअनुसार उनले निर्वाचन अभियानमा कुल १० लाख २४ हजार ९२५ रुपैयाँ खर्च भएको जनाएका छन् । उक्त विवरणमा सबैभन्दा बढी रकम प्रचार–प्रसारमा खर्च भएको उल्लेख गरिएको छ । प्रचार–प्रसारका विभिन्न गतिविधिमा २ लाख ८४ हजार ७६० रुपैयाँ खर्च गरिएको यादवले जनाएका छन् ।
यसैगरी सवारी साधन भाडामा १ लाख ९० हजार रुपैयाँ तथा इन्धन खर्चतर्फ १ लाख ५३ हजार ६४० रुपैयाँ खर्च भएको विवरणमा उल्लेख छ । त्यस्तै अन्य प्रचार सामग्री उत्पादन र वितरणमा १ लाख ५२ हजार ५५० रुपैयाँ खर्च गरिएको बताइएको छ । यादवका अनुसार निर्वाचन अभियानका क्रममा कार्यालय सञ्चालन तथा प्रतिनिधि परिचालनमा ८६ हजार रुपैयाँ खर्च भएको छ भने गोष्ठी तथा अन्तरक्रिया कार्यक्रमका लागि ६४ हजार ९७५ रुपैयाँ व्यय गरिएको छ ।
त्यसैगरी छापा तथा विद्युतीय सञ्चारमाध्यम र सामाजिक सञ्जालमा प्रचारका लागि २५ हजार रुपैयाँ खर्च गरिएको उनले बताएका छन् । मनोनयन दर्ताका क्रममा १० हजार रुपैयाँ तथा मतदाता नामावली खरिदमा ३ हजार रुपैयाँ खर्च भएको विवरणमा उल्लेख गरिएको छ । निर्वाचनमा सहभागी उम्मेदवारहरूले कानुनी व्यवस्थाअनुसार आफ्नो निर्वाचन खर्चको विवरण सम्बन्धित निर्वाचन कार्यालयमा अनिवार्य रूपमा बुझाउनुपर्ने प्रावधान रहेको छ ।
प्रतिक्रिया दिनुहोस् !