वीरगंज (पर्सा), २७ फागुन । राष्ट्रिय स्वतन्त्र पार्टी (रास्वपा) का पर्सा जिल्ला सभापति तथा प्रतिनिधिसभा सदस्यमा निर्वाचित हरि पन्तले पर्साको चारै क्षेत्रबाट पार्टीका उम्मेदवार विजयी भएपछि मतदाता, शुभचिन्तक र पार्टी कार्यकर्ताप्रति हार्दिक धन्यवाद तथा शुभकामना व्यक्त गरेका छन् । पन्तले एक धन्यवाद सन्देश जारी गर्दै पर्साका चारै निर्वाचन क्षेत्रबाट रास्वपाका उम्मेदवारहरू विजयी हुनु परिवर्तनको स्पष्ट संकेत भएको बताएका छन् । उनले देशमा व्याप्त भ्रष्टाचार र कुशासन अन्त्य गर्दै सुशासन स्थापना गर्ने प्रतिबद्धता पनि व्यक्त गरेका छन् ।
सन्देशमा पन्तले भनेका छन्, ‘पर्सा निर्वाचन क्षेत्र नम्बर–१ को प्रतिनिधिसभा सदस्य पदमा मलाई निर्वाचित गराउनु भएकोमा तथा जिल्लाका चारै क्षेत्रबाट राष्ट्रिय स्वतन्त्र पार्टीका उम्मेदवारहरूलाई विजय गराउनु हुने सम्पूर्ण जिल्लावासी, मतदाता, शुभेच्छुक, पार्टीका नेता तथा कार्यकर्ता, साथीहरू र परिवारका सदस्यहरूप्रति हार्दिक आभार प्रकट गर्दछु ।’
उनले मतदाताको साथ, सहयोग र मार्गदर्शनका कारण देशभर परिवर्तनको लहर आएको दाबी गरेका छन् । ‘तपाईँहरूको साथ, सहयोग र मार्गदर्शनले आज हामीले देशैभर परिवर्तनको लहर ल्याउन सफल भएका छौँ,’ पन्तले उल्लेख गरेका छन् । पन्तका अनुसार अब आगामी दिनमा आफू लगायत पर्साका चारै क्षेत्रबाट निर्वाचित प्रतिनिधिसभा सदस्यहरूको मुख्य जिम्मेवारी परिवर्तनलाई संस्थागत गर्दै भ्रष्टाचार, बेथिति र कुशासन अन्त्य गर्नु तथा विधिको शासन स्थापना गर्नु हुनेछ । देशलाई प्रगतिको बाटोमा अगाडि बढाउन सबैको निरन्तर सुझाव, सल्लाह, माया र आशीर्वाद आवश्यक रहने पनि उनले बताएका छन् ।
यस पटकको निर्वाचनमा पर्सा जिल्लाका चारै प्रतिनिधिसभा क्षेत्रमा रास्वपाका उम्मेदवार विजयी भएका छन् । पर्सा–१ बाट हरि पन्त निर्वाचित भएका छन् भने पर्सा–२ बाट सुशील कुमार कानु, पर्सा–३ बाट रमाकान्त चौरसिया र पर्सा–४ बाट टेक बहादुर शाक्य ऐतिहासिक मतका साथ निर्वाचित भएका छन् ।
समानुपातिक तर्फ पनि पर्सामा रास्वपा नै पहिलो पार्टी बनेको छ । पर्सा जिल्लामा पार्टीले हासिल गरेको उल्लेखनीय सफलतालाई राजनीति विश्लेषकहरूले परिवर्तनको संकेतका रूपमा व्याख्या गरेका छन् । यस विजयले स्थानीय स्तरमा पार्टीको प्रभाव विस्तार गर्नुका साथै राष्ट्रिय स्तरमा भ्रष्टाचार विरोधी अभियानलाई थप बल पुग्ने अपेक्षा गरिएको छ ।
प्रतिक्रिया दिनुहोस् !