वीरगंज (पर्सा), २४ फागुन । सर्वोच्च अदालतले त्रिभुवन राजपथ काठमाडौँ-पथलैया-वीरगंज भन्सार अन्तर्गत वीरगंज क्षेत्रको सडक विस्तार सम्बन्धी रिट निवेदन पूर्ण रूपमा खारेज गरेको फैसलाको पूर्ण पाठ सार्वजनिक भएको छ । फैसला एक बर्ष पहिले नै सुनाई सकेको भएतापनि सो फैसला कुन आधारमा सुनाएको हो, भन्ने बारे विस्तृत विवरण पूर्ण पाठमा उल्लेख छ ।
गत वर्ष फागुन २८ गते सर्वोच्चका न्यायाधीशद्वय विनोद शर्मा र महेश शर्मा पौडेलको संयुक्त इजलासले रिट खारेजको फैसला सुनाएको हो । फैसलाको पूर्ण पाठ आए पछि सम्बन्धीत र सरोकारवलाहरूको जिज्ञासा मेटिने अपेक्षा गरिएको छ ।
वीरगंजको मेनरोड खण्डमा सडकको दायाँबायाँ २५–२५ मिटरको विस्तार गर्न नहुने भन्दै सर्वोच्च अदालतमा वीरगंजका लक्ष्मण साह रौनियार लगायत पाँच जना घरधनीहरूले छुट्टा छुट्टै दायर गरेको रिट, लामो समयदेखि सर्वोच्चमा विचाराधीन थियो । सो रिट अदालतले खारेज गरि सकेको भएतापनि, महानगरपालिकाले विस्तार गर्न खोज्दा, पूर्णपाठ आउनुपर्छ भन्दै विभिन्न पक्षबाट अवरोध गर्दै आएका थिए ।
फैसलाको पुर्ण पाठ आएपछि वीरगंजको मेनरोड खण्डको सडक दायाँबायाँ २५–२५ मिटर चौडा गर्ने बाटो खुलेको छ । त्रिभुवन राजपथ अन्तर्गतपर्ने गण्डकचोकदेखि पावर हाउसचोक, घण्टाघरचोकदेखि–आर्दशनगर, रजतजयन्तीचोक, शङ्कराचार्यगेट हुदैँ मितेरी पुलसम्मको मुख्य सडक विस्तारको काम मुद्दासँगै रोकिएको थियो, जुन अव खुला भएको छ ।
प्रतिक्रिया दिनुहोस् !