झापा, २३ फागुन । झापा निर्वाचन क्षेत्र नम्बर–५ बाट बालेन शाह प्रतिनिधिसभा सदस्यमा निर्वाचित भएका छन् । राष्ट्रिय स्वतन्त्र पार्टी (रास्वपा) का वरिष्ठ नेता शाहले अन्तिम मतगणनाको परिणामअनुसार ६८ हजार ३४८ मत प्राप्त गर्दै स्पष्ट जित हासिल गरेका हुन् । शाहले केपी शर्मा ओलीलाई ४९ हजार ६१४ मतान्तरले पराजित गरेका छन् । नेकपा (एमाले)का अध्यक्षसमेत रहेका ओलीले १८ हजार ७२४ मत प्राप्त गरेका छन् ।
यसैगरी, श्रम संस्कृति पार्टीका उम्मेदवार समिर तामाङले ९ हजार २३३ मत ल्याएका छन् । नेपाली कांग्रेसकी उम्मेदवार मंधरा चिमरियाले १ हजार ८२१ मत प्राप्त गरेकी छन् । त्यसैगरी राष्ट्रिय प्रजातन्त्र पार्टीका लम्मी प्रसाद संग्रौलाले १ हजार ५३६ मत ल्याउँदा नेपाल कम्युनिष्ट पार्टीका रन्जित तामाङले १ हजार ४६१ मत प्राप्त गरेका छन् ।
यस वर्षको प्रतिनिधिसभा निर्वाचनमा झापा–५ देशभरकै सबैभन्दा धेरै चर्चा र चासोको केन्द्र बनेको निर्वाचन क्षेत्रमध्ये एक थियो । काठमाडौं महानगरपालिकाका पूर्वमेयर शाहले उम्मेदवारी दिएपछि उनको र ओलीबीचको प्रतिस्पर्धालाई लिएर देशव्यापी रूपमा व्यापक बहस र चासो देखिएको थियो ।
प्रतिक्रिया दिनुहोस् !