वीरगंज (पर्सा), २३ फागुन । पर्सा जिल्लाको प्रतिनिधिसभा निर्वाचन क्षेत्र नम्बर–४ मा मतगणना जारी रहँदा राष्ट्रिय स्वतन्त्र पार्टी (रास्वपा) का उम्मेदवार टेक बहादुर शाक्य अग्रस्थानमा रहेका छन् । पछिल्लो मतपरिणामअनुसार शाक्यले २६ हजार ३९६ मत प्राप्त गर्दै स्पष्ट अग्रता कायम गरेका हुन् । उनका मुख्य प्रतिद्वन्द्वी नेपाली कांग्रेसका उम्मेदवार रमेश रिजाल ११ हजार ८४३ मतसहित दोस्रो स्थानमा रहेका छन् ।
त्यस्तै नेकपा (एमाले)का उम्मेदवार जालिम मियाँ मंसुरी ११ हजार १५६ मत प्राप्त गर्दै तेस्रो स्थानमा छन् । यसैगरी जनता समाजवादी पार्टीका कृपासिन्धु प्रसाद चौधरीले ४ हजार ४६९ मत प्राप्त गरेका छन् । नेपाल कम्युनिष्ट पार्टीका जयप्रकाश थारुले २ हजार ९८९ मत प्राप्त गरेका छन् । अन्य उम्मेदवारहरूमध्ये जनमत पार्टीकी सिमा देवी कलवारले २७० मत प्राप्त गरेकी छन् । त्यस्तै श्रम संस्कृति पार्टीका विष्णु लोपचनले २५१ मत, उज्यालो नेपाल पार्टीका विनोद प्रसाद यादवले २१६ मत प्राप्त गरेका छन् ।
त्यसैगरी राष्ट्रिय प्रजातन्त्र पार्टीका शान्त कुमार जोशीले १४९ मत प्राप्त गर्दा नेपाल जनता पार्टीका अरुण कुमार कुशवाहाले १२६ मत प्राप्त गरेका छन् । मतगणना जारी रहेकाले अन्तिम परिणाम आउन अझै समय लाग्ने निर्वाचन अधिकृतको कार्यालयले जनाएको छ । हालसम्मको मतपरिणामले भने पर्सा–४ मा रास्वपाका उम्मेदवार शाक्यको बलियो अग्रता देखिएको छ । मतगणना स्थलमा विभिन्न दलका प्रतिनिधि तथा सुरक्षाकर्मीको उपस्थितिमा मतगणना प्रक्रिया जारी रहेको छ । राजनीतिक दलका नेता तथा समर्थकहरू अन्तिम परिणामको प्रतीक्षामा रहेका छन् ।
प्रतिक्रिया दिनुहोस् !