वीरगंज (पर्सा), २३ फागुन । पर्सा जिल्लाको प्रतिनिधिसभा निर्वाचन क्षेत्र नम्बर–३ मा मतगणना जारी रहेका बेला नेकपा उम्मेदवार छोटेलाल यादवले पार्टी छाडेको घोषणा गरेका छन् । उनले आफ्नो आधिकारिक फेसबुकमार्फत पार्टी परित्याग गरेको जानकारी सार्वजनिक गरेपछि स्थानीय राजनीतिक क्षेत्रमा विभिन्न चर्चा र आरोपहरू उठ्न थालेका छन् ।
यादवले सामाजिक सञ्जालमा स्टाटस लेख्दै पार्टीबाट अलग भएको संकेत गरेपछि उनीमाथि पार्टी परिवर्तन गर्दै मतदाताको धारणा प्रभावित पार्ने प्रयास गरेको आरोप लगाइएको छ । मतगणना चलिरहेका बेला यस्तो अभिव्यक्ति सार्वजनिक भएपछि राजनीतिक वृत्तमा अनेक अड्कलबाजी सुरु भएको देखिएको छ ।
स्थानीय स्तरमा फैलिएको चर्चाअनुसार आफू निर्वाचित हुने सम्भावना कमजोर देखिएपछि यादवले आफ्नो पक्षमा आउन सक्ने मत अन्य उम्मेदवारतर्फ मोड्ने प्रयास गरेको तथा केही स्वार्थका लागि मत ‘बेचबिखन’ गरेको आरोप समेत लगाइएको बताइन्छ। तर यी आरोपहरूको औपचारिक पुष्टि भने भइसकेको छैन ।
यसैबीच, स्थानीय राजनीतिक वृतमा अर्को चर्चा पनि फैलिएको छ । उक्त चर्चाअनुसार यादवले हरिनारायण रौनियारसँग समन्वय गर्दै पूर्वमन्त्री राजकुमारको इशारामा पर्सा क्षेत्र नम्बर–२ र ३ का एमाले उम्मेदवारलाई पराजित गराउने रणनीति बनाएको भन्ने हल्ला चलिरहेको छ ।
तर, यी विषयमा सम्बन्धित व्यक्तिहरूबाट अहिलेसम्म कुनै आधिकारिक प्रतिक्रिया सार्वजनिक भएको छैन । निर्वाचन अधिकारीहरूका अनुसार भने क्षेत्र नम्बर–३ मा मतगणना प्रक्रिया नियमित रूपमा जारी रहेको छ ।
प्रतिक्रिया दिनुहोस् !