वीरगंज (पर्सा), २३ फागुन । नेकपा (एमाले)का तर्फबाट पर्सा निर्वाचन क्षेत्र नम्बर–२ मा प्रतिनिधिसभा सदस्य पदकी उम्मेदवार रिमा कुमारी यादवले निर्वाचन सम्पन्न भएपछि मतदाता, अभिभावक, युवा तथा महिलाप्रति धन्यवाद प्रकट गरेकी छन् । मतदानमार्फत आफूलाई दिएको विश्वास, साथ र माया प्रति उनले सबै मतदातालाई आभार व्यक्त गरेकी हुन् ।
सामाजिक सञ्जाल फेसबुकमार्फत आफ्नो धारणा सार्वजनिक गर्दै यादवले लोकतान्त्रिक व्यवस्थामा जनताको निर्णय नै अन्तिम हुने उल्लेख गर्दै मतदाताले मतमार्फत दिएको निर्णयलाई आफूले पूर्ण सम्मान गर्ने बताएकी छन् । साथै उनले निर्वाचनमा विजयी बनेका राष्ट्रिय स्वतन्त्र पार्टी (रास्वपा)का उम्मेदवार सुशिल साह कानुलाई बधाई दिँदै सफल कार्यकालको शुभकामना पनि दिएकी छन् ।
यादवले पर्सा–२ क्षेत्रको विकासलाई प्राथमिकतामा राख्दै शिक्षा, स्वास्थ्य, कृषि, रोजगारी र आधारभूत पूर्वाधारको सुदृढीकरणमा प्रभावकारी काम हुने विश्वास व्यक्त गरेकी छन् । आफू राजनीति क्षेत्रमा सेवा गर्ने उद्देश्यले आएको उल्लेख गर्दै उनले पर्सा–२ का नागरिकको सेवा, अधिकार संरक्षण र समग्र विकासका लागि निरन्तर सक्रिय रहने प्रतिबद्धता जनाएकी छन् ।
साथै उनले निर्वाचनमा सहभागी भई आफ्नो पक्षमा मत दिएका तथा लोकतान्त्रिक प्रक्रियामा सहभागी भएका सम्पूर्ण मतदाताप्रति हार्दिक धन्यवाद व्यक्त गरेकी छन् ।
प्रतिक्रिया दिनुहोस् !