कलैया (बारा), २३ फागुन । बारा निर्वाचन क्षेत्र नम्बर–३ बाट प्रतिनिधिसभा सदस्यमा राष्ट्रिय स्वतन्त्र पार्टी (रास्वपा) का उम्मेदवार ई. अरविन्द साह भारी मतान्तरसहित विजयी भएका छन् । उद्यमी तथा ग्रामीण विकास क्षेत्रमा सक्रिय समाजसेवीका रूपमा परिचित साहले पहिलो पटक संसदीय निर्वाचनमा प्रतिस्पर्धा गर्दै नै प्रभावशाली प्रदर्शन गरेका हुन् ।
निर्वाचन परिणामअनुसार साहले ४० हजार ६ सय ९७ मत प्राप्त गरेका छन् । उनका निकटतम प्रतिस्पर्धी फर्मुल्लाह मन्सुरले १० हजार ५२ मत मात्रै प्राप्त गरेका छन् । यससँगै दुवैबीचको मतान्तर ३० हजार ६ सय ४५ पुगेको छ । मन्सुर पूर्वमन्त्री तथा नेपाली कांग्रेसका सह–महामन्त्री हुन्, जो गगन थापाको नेतृत्वमा सम्पन्न कांग्रेसको दोस्रो विशेष महाधिवेशनबाट उक्त पदमा निर्वाचित भएका थिए ।
तेस्रो स्थानमा जनता समाजवादी पार्टी (जसपा) नेपालका पूर्वसांसद रामबाबु यादव रहेका छन् । उनले ६ हजार ८ सय ८४ मत प्राप्त गरेका छन् ।
यसैगरी नेकपा (एमाले) की नेतृ तथा पूर्वमन्त्री ज्वाला कुमारी साह चौथो स्थानमा सीमित भएकी छन् । यसअघि यही क्षेत्रबाट निर्वाचित सांसद समेत रहेकी साहले ५ हजार २ सय ७१ मत प्राप्त गरेकी छन् । उनी एमाले अध्यक्ष केपी शर्मा ओली निकट मानिने नेतृ हुन् र पार्टीको जिल्ला कमिटीको निर्णय विपरीत उनलाई टिकट दिइएको चर्चा समेत चलेको थियो ।
त्यसैगरी जनमत पार्टीका प्रमोद प्रसाद गुप्ताले ३ हजार ८ सय १९ मत प्राप्त गरेका छन् । विभिन्न दल परिवर्तन गर्दै आएका गुप्ताले अन्तिम समयमा जनमत पार्टीबाट उम्मेदवारी दिएका थिए । विजयी उम्मेदवार इन्जिनियर साह नेपालको चर्चित डिजिटल भुक्तानी प्लेटफर्म खल्ती तथा स्पैरो एस.एम.एस. सञ्चालन गर्ने जानकी टेक्नलोजीका सह–संस्थापक समेत हुन् ।
प्रविधि र ग्रामीण विकासमा आधारित उद्यमशीलताको क्षेत्रमा सक्रिय रहेका साहले पहिलो प्रयासमै संसद प्रवेश गर्न सफल भएका हुन् । उनको फराकिलो जितले बारा–३ मा नयाँ पुस्ताको नेतृत्व उदय भएको र परिवर्तनको सन्देश दिएको स्थानीयवासीहरू बताउँछन् ।
प्रतिक्रिया दिनुहोस् !