कलैया (बारा), २३ फागुन । बारा निर्वाचन क्षेत्र नम्बर–४ बाट प्रतिनिधिसभा सदस्यमा राष्ट्रिय स्वतन्त्र पार्टी (रास्वपा) का उम्मेदवार रहबर अन्सारी फराकिलो मतान्तरसहित विजयी भएका छन् । पूर्वराज्यमन्त्री तथा निर्वतमान प्रदेशसभा सदस्य समेत रहेका अन्सारीले ४१ हजार २०० मत प्राप्त गर्दै प्रभावशाली जित दर्ता गरेका हुन् ।
निर्वाचन परिणामअनुसार अन्सारीले नेकपा (एमाले) का उम्मेदवार तथा पूर्वमन्त्री कृष्ण कुमार श्रेष्ड (किसान) लाई २९ हजार ५६१ मतान्तरले पराजित गरेका छन् । एमालेका श्रेष्ठले भने ११ हजार ६३९ मत मात्रै प्राप्त गरेका छन् । श्रेष्ठ यसअघि यही क्षेत्रबाट निर्वाचित प्रतिनिधिसभा सदस्य पनि थिए ।
अन्य उम्मेदवारहरूमध्ये जनता समाजवादी पार्टी (जसपा) नेपालका सन्जु साह कानुले ७ हजार ५९३, नेपाली कांग्रेसका श्यामबाबु गुप्ताले ७ हजार ११३ तथा नेपाल कम्युनिष्ट पार्टी (नेकपा) का अजय कुशवाहाले २ हजार ६७ मत प्राप्त गरेका छन् ।
यसैगरी राष्ट्रिय एकता दलका विनय यादवले १ हजार २३, राष्ट्रिय निर्माण दलका समिम मियाँ अन्सारीले ८८१, आम जनता पार्टीका उमेश कुमार कुशवाहाले ८३३ तथा राष्ट्रिय प्रजातन्त्र पार्टीका दिलिप कुमार शर्माले ८०९ मत प्राप्त गरेका छन् ।
त्यस्तै राष्ट्रिय परिवर्तन पार्टीका सर्वेन्द्र खनालले ४६४, उज्यालो नेपाल पार्टीका सन्तोष कुमार गुप्ताले २२०, श्रम संस्कृति पार्टीका गोपाल बहादुर खत्रीले १४४ तथा स्वतन्त्र उम्मेदवार भोला मियाँले १३४ मत प्राप्त गरेका छन् । अन्सारीले हासिल गरेको यो फराकिलो जीतले बारा–४ मा रास्वपा र स्वयं अन्सारीको राजनीतिक प्रभाव अझ सुदृढ भएको राजनीतिक विश्लेषकहरूको भनाइ छ ।
प्रतिक्रिया दिनुहोस् !