वीरगंज (पर्सा), १७ फागुन । पर्सा निर्वाचन क्षेत्र नम्बर–२ बाट प्रतिनिधिसभा सदस्यका लागि नेपाल कम्युनिस्ट पार्टी (एमाले)की उम्मेदवार रिमा यादवले शनिबार वीरगंज महानगरपालिका–३ को छपकैया क्षेत्रमा व्यापक घरदैलो अभियान सञ्चालन गरेकी छन् । कार्यक्रममा स्थानीय बासिन्दाको उल्लेखनीय उपस्थिति देखिएको थियो । घरदैलोका क्रममा मतदाताले यादवलाई फूलमाला र गम्छा ओढाएर स्वागत गरे भने केही स्थानमा मिठाई खुवाउँदै विजयको अग्रिम शुभकामना समेत व्यक्त गरेका थिए । स्थानीयको आत्मीयता र समर्थनले अभियानमा थप उत्साह थपिएको एमाले कार्यकर्ताहरूले बताएका छन् ।
संवादका क्रममा उम्मेदवार यादवले आफू सधैं जनताको सुख–दुःखमा साथ दिने प्रतिबद्धता दोहोर्याइन् । मधेश आन्दोलनको बलमा स्थापित संघीय संरचनालाई सुदृढ र सुरक्षित राख्न आवश्यक रहेको उल्लेख गर्दै उनले त्यसका लागि एमाले नेतृत्वलाई मजबुत बनाउनुपर्ने धारणा राखिन् । देश यतिबेला स्थायित्व र विकासको बाटो रोज्ने शक्ति र अस्थिरता निम्त्याउने प्रवृत्तिबीच स्पष्ट ध्रुवीकरणको अवस्थामा रहेको भन्दै उनले एमालेको सूर्य चिन्हमा मतदान गर्न आग्रह गरिन् । यादवले राष्ट्रियता सुदृढीकरण, आर्थिक समृद्धि र समाजवादउन्मुख विकासको मार्गमा एमाले प्रतिबद्ध रहेको उल्लेख गरिन् । चुनावको समयमा मात्र सक्रिय देखिने नेतृत्वप्रति सचेत रहन उनले मतदातालाई आग्रह गर्दै निरन्तर जनतासँग जोडिएको र काम गर्ने नेतृत्व रोज्नुपर्नेमा जोड दिइन् ।
आफ्ना प्राथमिकताबारे स्पष्ट पार्दै उनले गरिबी न्यूनीकरण, रोजगारीका अवसर सिर्जना, कृषि आधुनिकीकरण, पर्यटन प्रवद्र्धन, स्थानीय उद्योगको विस्तार, महिला सशक्तीकरण तथा युवालाई अवसर उपलब्ध गराउने कार्यक्रमलाई प्राथमिकतामा राख्ने बताइन् । साथै सडक, विद्यालय, अस्पताल, धार्मिक संरचना, मसानघाट, खानेपानी, सिँचाइ र विद्युत् विस्तार जस्ता आधारभूत पूर्वाधारमा आफूले काम गर्दै आएको दाबी गरिन् । संसद्मा पर्साका मुद्दा निरन्तर उठाउँदै आएको स्मरण गराउँदै आगामी दिनमा अझ प्रभावकारी रूपमा क्षेत्रको आवाज बुलन्द गर्ने प्रतिबद्धता व्यक्त गरिन् ।
घरदैलोका क्रममा स्थानीयले उठाएका खानेपानी, सडक मर्मत, बेरोजगारी तथा सेवा सुविधासम्बन्धी गुनासोहरूलाई गम्भीरतापूर्वक लिएर समाधानका लागि पहल गर्ने आश्वासन समेत उनले दिइन् । वर्तमान राजनीतिक अवस्थालाई संकेत गर्दै राष्ट्रिय अखण्डता, संविधान र संघीय संरचनाको सुदृढीकरणमा एमाले नेतृत्वको भूमिका महत्वपूर्ण रहने उनको धारणा थियो । अभियानमा एमालेका केन्द्रीय सदस्य विजय सरावगी, मधेश प्रदेश उपाध्यक्ष विचारी यादव, जिल्ला सचिव महेश दास, वीरगंज महानगरका लेखा समिति संयोजक अजय साह, प्रेस चौतारी पर्साका अध्यक्ष निरञ्जन मिश्रलगायत स्थानीय नेता कार्यकर्ताको सक्रिय सहभागिता रहेको थियो ।
निर्वाचन मिति नजिकिँदै जाँदा पर्सा–२ मा दलहरूबीच प्रतिस्पर्धा तीव्र बन्दै गएको छ । यस्तो अवस्थामा छपकैयामा देखिएको उत्साहजनक सहभागिताले एमाले उम्मेदवार यादवको अभियानलाई थप ऊर्जा दिएको बताइएको छ ।
प्रतिक्रिया दिनुहोस् !