वीरगंज (पर्सा), १७ फागुन । निर्वाचन सुरक्षाका लागि पर्सा, बारा, रौतहट लगायत मधेश प्रदेशका जिल्लाहरूमा नेपाली सेना सहितका तीनवटै सुरक्षा निकायले विशेष सक्रियता बढाएको छ । निर्वाचनको समय रौतहटमा शान्ति सुरक्षा कायम राख्न पैदल, मोटरसाइकल, सवारी साधन तथा बख्तरबन्द गाडीमार्फत सेनाले गस्ती गर्न थालेको छ ।
प्रतिनिधि सभा सदस्य निर्वाचन २०८२ लाई स्वतन्त्र, निष्पक्ष र शान्तिपूर्ण वातावरणमा सम्पन्न गराउने उद्देश्यले रौतहट जिल्लामा तैनाथ नेपाली सेनाको श्री नारायणदल गणले सुरक्षा व्यवस्थालाई थप सुदृढ बनाएको हो । जिल्लाका विभिन्न मतदान स्थलहरूमा एकैसाथ गस्ती परिचालन गर्दै सम्भावित जोखिमलाई नियन्त्रणमा लिन सक्रियता बढाएको छ । निर्वाचन मिति नजिकिँदै जाँदा सेनाले जिल्लाभर सुरक्षा सतर्कता उच्च पारेको हो । मतदान केन्द्र वरपर विशेष निगरानी राखिएको र कुनै पनि अवाञ्छित गतिविधि हुन नदिन कडा सुरक्षा प्रबन्ध मिलाइएको सेनाले जानकारी दिएको छ । श्री नारायणदल गणको टोली रौतहट जिल्लाका सबै १७ वटै स्थानीय तहमा तैनाथ छ । सेनाले नेपाल प्रहरी र सशस्त्र प्रहरी बल समेत तीनवटै सुरक्षा निकाय विच समन्वय गर्दै संयुक्त गस्ती तथा सुरक्षा व्यवस्थापन भइरहेको जनाएको छ । यसैगरि बारा जिल्लामा पनि सुरक्षा व्यवस्था थप कडा पारिएको छ । निर्वाचन अवधिमा सम्भावित अवाञ्छित गतिविधि नियन्त्रण गर्न नेपाली सेनाले जिल्लाका विभिन्न स्थानमा बख्तरबन्द गाडीसहित गस्ती सुरु गरेको छ ।
सुरक्षा निकायका अनुसार मतदातालाई निर्धक्क रूपमा मतदान गर्ने वातावरण सिर्जना गर्न र शान्ति–सुरक्षा कायम राख्न सेनाको उपस्थिति बढाइएको हो । मधेश प्रदेशको सुरक्षा संवेदनशीलतालाई ध्यानमा राख्दै मुख्य व्यापारिक केन्द्र, राजमार्ग तथा ग्रामीण भेगहरूमा निगरानी तीव्र पारिएको छ । बाराका चारै निर्वाचन क्षेत्रमा नेपाली सेना, नेपाल प्रहरी र सशस्त्र प्रहरी बल नेपालले संयुक्त रूपमा सुरक्षा गस्ती सञ्चालन गरिरहेका छन् । निर्वाचन अवधिभर शान्तिपूर्ण वातावरण सुनिश्चित गर्न सुरक्षा संयन्त्रहरू उच्च सतर्कतामा राखिएको जनाइएको छ । प्रशासनले नागरिकलाई अफवाहमा नलाग्न र कुनै शंकास्पद गतिविधि देखिए तत्काल सुरक्षा निकायलाई जानकारी गराउन आग्रह गरेको छ ।
प्रतिक्रिया दिनुहोस् !