वीरगंज (पर्सा), १६ फागुन । पर्सा निर्वाचन क्षेत्र नम्बर १ मा जनमत पार्टीका प्रतिनिधिसभा सदस्य उम्मेदवार ओमप्रकाश सर्राफको समर्थनमा युवाहरूले भव्य मोटरसाइकल र्याली प्रदर्शन गरेका छन् । जनमत पार्टी निकट युवा दस्ता र जेन्जि जनमत संघको संयोजनमा सम्पन्न उक्त र्यालीले चुनावी माहोललाई थप तातो बनाएको छ ।
शनिबार आयोजित र्याली वीरगंजका विभिन्न स्थान हुँदै क्षेत्रका मुख्य चोक तथा बस्तीहरू परिक्रमा गरेको थियो । सयौं युवाको उल्लेखनीय सहभागितासहित सम्पन्न र्यालीमा सहभागीहरूले पार्टीका झण्डा, ब्यानर र नारासहित सरार्फप्रति खुलेर समर्थन जनाए । ‘परिवर्तनका लागि जनमत’ र ‘युवाको रोजाइ, ओमप्रकाश सरार्फ’ जस्ता नाराले चुनावी वातावरणलाई ऊर्जाशील बनाएको थियो ।
आयोजक पक्षका अनुसार युवाहरूको उल्लेखनीय उपस्थितिले पर्सा–१ मा जनमत पार्टीप्रति बढ्दो आकर्षण र भरोसा स्पष्ट पारेको छ । देश र क्षेत्रको समुन्नतिका लागि सक्षम, इमानदार र प्रतिबद्ध नेतृत्व आवश्यक रहेको उल्लेख गर्दै उनीहरूले सरार्फ नै त्यसको उचित विकल्प भएको दाबी गरेका छन् ।
र्यालीमा सहभागी युवाहरूले रोजगारी, शिक्षा, स्वास्थ्य सेवा तथा पूर्वाधार विकासलाई प्राथमिकतामा राख्ने नेतृत्वको आवश्यकता औंल्याए । परम्परागत राजनीतिक अभ्यासभन्दा फरक दृष्टिकोणसहित जनताको अपेक्षा सम्बोधन गर्न सक्ने उम्मेदवारका रूपमा सरार्फलाई अघि सारिएको उनीहरूको भनाइ थियो ।
उम्मेदवार ओमप्रकाश सरार्फले युवाहरूको उत्साहप्रति आभार व्यक्त गर्दै परिवर्तनको प्रमुख शक्ति नै युवा भएको बताए । युवाको सीप, ऊर्जा र क्षमतालाई विकासको मुख्य आधार बनाउने आफ्नो योजना रहेको उल्लेख गर्दै उनले पर्सा–१ लाई आर्थिक, शैक्षिक र भौतिक पूर्वाधारको दृष्टिले नमुना क्षेत्र बनाउने प्रतिबद्धता दोहोर्याए ।
जनमत पार्टीले घरदैलो, जनसम्पर्क, मोटरसाइकल र्याली तथा युवासँग प्रत्यक्ष संवादजस्ता कार्यक्रममार्फत चुनावी अभियानलाई तीव्रता दिइरहेको जनाएको छ । निर्वाचन मिति नजिकिँदै जाँदा युवाहरूको सक्रियता बढ्दै गएको र यसले पर्सा–१ को चुनावी प्रतिस्पर्धालाई थप रोचक बनाएको स्थानीय राजनीतिक विश्लेषकहरूको भनाइ छ । 
प्रतिक्रिया दिनुहोस् !