वीरगंज (पर्सा), १६ फागुन । उज्यालो नेपाल पार्टी का पर्सा निर्वाचन क्षेत्र नं. १ का प्रतिनिधिसभा सदस्य उम्मेदवार रामकिशोर सिंह (पराग) ले वीरगंज महानगरपालिका–२२ जगरनाथपुर क्षेत्रमा घरदैलो कार्यक्रम सम्पन्न गरेका छन् । अभियानका क्रममा जेन–जेड युवादेखि स्थानीय बासिन्दासम्मको उल्लेखनीय सहभागिता देखिएको थियो । उम्मेदवार सिंहलाई फूलमालाले स्वागत गर्दै स्थानीयहरूले उत्साहपूर्ण वातावरणमा सम्मान प्रकट गरेका थिए ।
घरदैलोका अवसरमा सिंहले बासिन्दासँग प्रत्यक्ष संवाद गर्दै टोल टोलका समस्या, जनगुनासा र सुझावहरू संकलन गरे । खानेपानी, सडक, सरसफाइ, शिक्षा तथा स्वास्थ्य सेवा सुधारजस्ता विषयमा उठेका सवालहरूलाई प्राथमिकताका साथ समाधान गर्ने प्रतिबद्धता उनले जनाए । ‘जनताको विश्वास नै मेरो शक्ति हो, त्यसलाई परिणाममा रूपान्तरण गर्नेछु,’ उनले बताए ।
कार्यक्रममा सहभागी स्थानीयवासीहरूले सिंहप्रति भरोसा व्यक्त गर्दै आगामी निर्वाचनका लागि अग्रिम शुभकामना दिएका थिए । साथै, मतदाताले उम्मेदवारको योग्यता, दृष्टिकोण र कार्यक्षमता मूल्यांकन गरेर मात्र मतदान गर्नुपर्ने धारणा समेत व्यक्त गरेका थिए । सिंहले युवामैत्री कार्यक्रमलाई विशेष जोड दिँदै रोजगारी सिर्जना, गुणस्तरीय शिक्षाको विस्तार र सहज स्वास्थ्य सेवाको पहुँचलाई आफ्नो प्रमुख एजेन्डा रहेको स्पष्ट पारे । युवालाई अवसर दिएर स्थानीय स्तरमै आर्थिक गतिविधि बढाउने योजना उनले अघि सारे ।
उत्साहपूर्ण सहभागितासहित सम्पन्न उक्त कार्यक्रमले जगरनाथपुर क्षेत्रमा उज्यालो नेपाल पार्टीप्रति सकारात्मक माहोल निर्माण हुँदै गएको संकेत गरेको सहभागीहरूले बताएका छन् । चुनाव नजिकिँदै जाँदा सिंहले जनसम्पर्क कार्यक्रमलाई अझ सशक्त बनाउने बताएका छन् । 
प्रतिक्रिया दिनुहोस् !