वीरगंज (पर्सा), १६ फागुन । उज्यालो नेपाल पार्टीका तर्फबाट पर्सा निर्वाचन क्षेत्र नं. १ का प्रतिनिधिसभा सदस्य उम्मेदवार रामकिशोर सिंह (पराग) ले वीरगंजका विभिन्न बस्तीमा रात्रिकालीन घरदैलो अभियान सञ्चालन गरेका छन् । शनिबार आयोजित अभियानअन्तर्गत उनले वीरगंज महानगरपालिका–१८ को सुखचैना र वीरगंज महानगरपालिका–२१ को पटेलनगर क्षेत्रमा पुगेर मतदातासँग प्रत्यक्ष संवाद गरेका थिए । साँझपखदेखि सुरु भएको कार्यक्रम उत्साहजनक सहभागितासहित सम्पन्न भएको जनाइएको छ ।
घरदैलोका क्रममा सिंहले स्थानीयवासीका समस्या, गुनासा र सुझावहरू ध्यानपूर्वक सुनेका थिए । खानेपानी, सडक, सरसफाई, शिक्षा तथा स्वास्थ्यजस्ता आधारभूत विषयमा उठेका सवालहरू समाधानका लागि आफू प्रतिबद्ध रहेको उनले बताएका छन् । ‘जनताको समस्या बुझेर समाधानतर्फ अग्रसर हुनु नै प्रतिनिधिको पहिलो कर्तव्य हो,’ उनले भने ।
कार्यक्रममा सहभागी स्थानीय बासिन्दाले उम्मेदवार सिंहप्रति भरोसा व्यक्त गर्दै आगामी निर्वाचनका लागि शुभकामना दिएका थिए । उनीहरूले योग्य, शिक्षित र जनभावनाप्रति संवेदनशील उम्मेदवारलाई विचारपूर्वक छान्नुपर्ने धारणा पनि राखेका थिए । सिंहले विशेषगरी युवाको भविष्यलाई केन्द्रमा राखेर आफ्ना योजनाहरू अघि सारेका छन् । रोजगारी सिर्जना, गुणस्तरीय शिक्षा प्रणालीको विकास तथा सहज र सुलभ स्वास्थ्य सेवाको विस्तार आफ्नो प्राथमिकतामा रहने उनले स्पष्ट पारे । युवालाई अवसर प्रदान गर्न सके क्षेत्रको समग्र विकास सम्भव हुने उनको विश्वास छ ।
स्थानीयहरूको उल्लेखनीय उपस्थितिमा सम्पन्न उक्त कार्यक्रमले क्षेत्रमा उज्यालो नेपाल पार्टीप्रति सकारात्मक माहोल बन्दै गएको संकेत गरेको सहभागीहरूले बताएका छन् । चुनाव नजिकिँदै जाँदा सिंहले घरदैलो र जनसम्पर्क कार्यक्रमलाई अझै सशक्त बनाउने तयारी गरेका छन् । 
प्रतिक्रिया दिनुहोस् !