वीरगंज (पर्सा), २९ माघ । काठमाडौंको भद्रकालीबाट पक्राउ परेका बाराको कलैया उपमहानगरपालिका–२० का २४ वर्षीय मोहम्मद सेफविरुद्ध करिब २० करोड रुपैयाँ बराबरको सम्पत्ति शुद्धीकरण मुद्दा दायर गरिएको छ । प्रहरीका अनुसार मंसिर १० गते साँझ पक्राउ परेका सेफको मोबाइलमा १९ करोड ८१ लाख ४९ हजार ६८१ रुपैयाँ बराबरको शंकास्पद कारोबार फेला परेको हो ।
सोही रकम बराबरको बिगो मागदाबी गर्दै उनीविरुद्ध मुद्दा दायर गरिएको छ । जिल्ला प्रहरी परिसर काठमाडौंको अनुसन्धान प्रतिवेदनका आधारमा सरकारी वकिल कार्यालयले काठमाडौं जिल्ला अदालतमा उनीविरुद्ध सम्पत्ति शुद्धीकरण मुद्दा दायर गरेको जनाएको छ । प्रहरीले पक्राउ गर्दा सेफबाट दुई थान मोबाइल बरामद गरेको थियो ।
ती मोबाइलमा क्रिप्टोकरेन्सीसम्बन्धी कारोबार भेटिएपछि डिजिटल फरेन्सिक ल्याबमा जाँचका लागि पठाइएको थियो, जहाँ थप प्रमाण फेला परेको प्रहरीले जनाएको छ । प्रहरीसमक्ष बयानका क्रममा सेफले अनलाइनमार्फत चिनजान भएका मुराध आलम नाम गरेका व्यक्तिमार्फत क्रिप्टो कारोबार गरेको बताएका छन् ।
उनले राम्रो नाफा हुने बताएपछि कारोबार सुरु गरेको बताएका छन् । सेफका अनुसार मुराधले नाफा भएपछि मासिक रूपमा २०० देखि २५० अमेरिकी डलरसम्म रकम दिने गरेको बयान दिएका छन् । यस घटनाबारे थप अनुसन्धान भइरहेको प्रहरीले जनाएको छ ।
प्रतिक्रिया दिनुहोस् !