वीरगंज (पर्सा), २५ माघ । विद्यार्थीहरूको क्षमता, प्रतिभा र सम्भावनालाई पहिचान र प्रोत्साहन गर्ने उद्देश्यका साथ आयोजित विद्यार्थी महोत्सव २०२६ उत्साहपूर्ण वातावरणमा सम्पन्न भएको छ । हिमालयन व्हाइट हाउस अन्तर्राष्ट्रिय कलेजको प्रस्तुति, प्रेसिडेन्सियल ग्राजुएट स्कूलको सहकार्य र एईसीसी ग्लोबलसँगको एसोसिएसनमा आयोजना गरिएको यस महोत्सवले विद्यार्थीहरूका लागि प्रेरणादायी र मार्गदर्शक प्लेटफर्म प्रदान गरेको आयोजकहरूले बताएका छन् ।
कार्यक्रम संयोजक रोशन गुप्ताका अनुसार, महोत्सवलाई सफल बनाउन गुरुकुल सीएले को–स्पोन्सर र युनिग्लोब कलेजले मुख्य स्पोन्सरको रूपमा सहयोग गरेका थिए। रोशन गुप्ताको अध्यक्षतामा सम्पन्न कार्यक्रममा १,५०० भन्दा बढी विद्यार्थीहरूको उत्साहजनक सहभागिता देखिएको थियो, जसले कार्यक्रमलाई अझ जीवन्त बनाएको थियो ।
महोत्सवमा शैक्षिक मार्गदर्शन, प्रेरणादायी सत्र, करियर विकाससम्बन्धी अन्तरक्रिया र विविध सांस्कृतिक प्रस्तुतीकरणहरू समावेश गरिएको थियो। विद्यार्थीहरूले आफ्ना प्रतिभा प्रस्तुत गर्ने अवसर पाए भने विज्ञ तथा वक्ताहरूबाट भविष्यको करियर र अध्ययनका सम्भावनाबारे उपयोगी जानकारी पनि प्राप्त गरे ।
कार्यक्रम सफल बनाउन आयोजक टिमको उल्लेखनीय योगदान रहेको थियो। मुख्य टिम सदस्यहरूमा प्रकाश कर्ण, रामबिनय यादव, आलोक यादव, आलोक ठाकुर र महावीर रजक सक्रिय रूपमा संलग्न रहेका थिए । उनीहरूको समन्वय र परिश्रमले कार्यक्रम व्यवस्थित र प्रभावकारी रूपमा सम्पन्न भएको बताइएको छ ।
आयोजक समितिले विद्यार्थी महोत्सवलाई केवल औपचारिक कार्यक्रमभन्दा बढी, विद्यार्थीहरूको उज्ज्वल भविष्य निर्माणतर्फको सामूहिक पहलका रूपमा व्याख्या गरेको छ । यस्ता कार्यक्रमहरूले विद्यार्थीहरूमा आत्मविश्वास बढाउने, सीप र क्षमता अभिवृद्धि गर्ने तथा अवसर पहिचान गर्न मद्दत पुर्याउने विश्वास व्यक्त गरिएको छ ।
कार्यक्रममा वीरगञ्ज महानगरपालिकाका निमित्त प्रमुख प्रशासकीय अधिकृत अरबिन्द लाल कर्ण, डा. प्रीती यादव, कमल चौगाइ, अरबिन्द श्रेष्ठ, प्रकाश कर्ण, आलोक ठाकुर, अन्कित चौरसियालगायत विभिन्न व्यक्तित्वहरूको उपस्थिति रहेको थियो ।
प्रतिक्रिया दिनुहोस् !