वीरगंज (पर्सा), २३ माघ । वीरगंजस्थित नेशनल मेडिकल कलेज तथा शिक्षण अस्पताल र मानवसेवा आश्रम, वीरगंजबीच असहाय तथा सेवावञ्चित वर्गलाई लक्षित गर्दै स्वास्थ्य सेवा सहकार्यसम्बन्धी समझदारी पत्रमा औपचारिक रूपमा हस्ताक्षर गरिएको छ । उक्त सम्झौता २०८२ साल माघ २३ गते नेशनल मेडिकल कलेज तथा शिक्षण अस्पतालको केन्द्रीय कार्यालय, वीरगंज–१५, पर्सामा सम्पन्न भएको हो ।
सम्झौताअनुसार मानवसेवा आश्रमद्वारा उद्धार गरिएका असहाय, बेसहारा, मानसिक तथा शारीरिक रूपमा अशक्त व्यक्तिहरूलाई नेशनल मेडिकल कलेजले आवश्यक स्वास्थ्य परीक्षण, उपचार, आपतकालीन सेवा तथा विशेषज्ञ चिकित्सकीय परामर्श विशेष सहुलियतसहित प्रदान गर्नेछ । साथै आश्रममा कार्यरत कर्मचारी तथा आश्रितहरूले पनि सो स्वास्थ्य सेवाबाट लाभ लिन सक्नेछन् ।
समझदारी पत्रमा नेशनल मेडिकल कलेज प्रा.लि.का तर्फबाट अध्यक्ष प्रा.डा. जैनुदिन अन्सारी तथा मानवसेवा आश्रमका तर्फबाट संरक्षक देवेश प्रसादले हस्ताक्षर गरेका छन् । कार्यक्रम नेशनल मेडिकल कलेजका व्यवस्थापकीय निर्देशक सहनवाज अन्सारी, सूचना प्रविधि प्रमुख ई. प्रदीप कुमार चौधरी, प्रशासन अधिकृत पप्पु सिंह, मधेश विश्वविद्यालयका उप–डिन एवं वीरगंज पब्लिक कलेजका संस्थापक प्रा.डा. दीपक शाक्य, वीरगंज उद्योग वाणिज्य संघका अध्यक्षलगायत विभिन्न क्षेत्रका व्यक्तित्वहरूको उपस्थितिमा सम्पन्न भएको थियो ।
कार्यक्रममा वक्ताहरूले समाजका कमजोर, असहाय तथा सेवाबाट वञ्चित नागरिकको उपचारमा निजी स्वास्थ्य संस्थाको भूमिका अझ जिम्मेवार र प्रभावकारी हुनुपर्नेमा जोड दिएका थिए । यस सहकार्यले स्वास्थ्य सेवामा पहुँच नपुगेका वर्गलाई सुलभ, सुरक्षित र गुणस्तरीय उपचार सेवा प्राप्त हुने विश्वास व्यक्त गरिएको छ ।
नेशनल मेडिकल कलेजले सामाजिक उत्तरदायित्वलाई संस्थागत मूल्यका रूपमा आत्मसात गर्दै ‘सेवा भन्दा पनि पर’ (सर्भिस वण्ड) भन्ने अवधारणासहित समुदाय केन्द्रित स्वास्थ्य सेवा विस्तारमा निरन्तर लागिरहने प्रतिबद्धता व्यक्त गरेको छ । मानवसेवा आश्रमसँगको यो सहकार्य सामाजिक सेवामा स्वास्थ्य क्षेत्रको योगदानलाई अझ सुदृढ बनाउने विश्वास गरिएको छ ।
प्रतिक्रिया दिनुहोस् !