वीरगंज (पर्सा), २३ माघ । पर्साको पोखरिया नगरपालिकामा माघ २६ गते सञ्चालन हुने महिलामा देखिने पाठेघरको मुखको क्यान्सरविरुद्धको एचपीभी खोप अभियानबारे जानकारी दिन स्वास्थ्य कार्यालय पोखरियाले पालिका–स्तरीय खोप समन्वय समिति, सञ्चारकर्मी र सरोकारवालासँग अभिमुखीकरण कार्यक्रम आयोजना गरेको छ ।
पोखरिया नगरपालिकाको सभाहलमा सम्पन्न कार्यक्रममा स्वास्थ्य शाखा सह–संयोजक शिवकुमार पटेलले अभियानको उद्देश्य, लक्षित समूह र कार्यविधिबारे विस्तृत जानकारी गराएका थिए । उनका अनुसार पालिकाका १० वडामा सञ्चालन हुने यस अभियानअन्तर्गत करिब ७ सय ४० जना कक्षा ६ मा अध्ययनरत बालिका तथा विद्यालय बाहिर रहेका १० वर्ष उमेरका किशोरीलाई एचपीभी खोप लगाइनेछ । साथै, गत वर्ष छुटेका कक्षा ७ देखि १० सम्म अध्ययनरत बालिका र विद्यालय नजाने ११ देखि १४ वर्ष उमेरका किशोरीहरूलाई पनि खोप प्रदान गरिनेछ ।
पटेलले माघ २६ गतेको अभियान सफल बनाउन सबै पक्षको सहयोग आवश्यक रहेको उल्लेख गर्दै खटिने स्वास्थ्यकर्मीलाई सहज वातावरण सिर्जना गरिदिन जनप्रतिनिधि, शिक्षक, राजनीतिक दल, सञ्चारकर्मी र संघसंस्थालाई आग्रह गरे । लक्षित उमेर समूहका बालिका तथा किशोरीलाई कुनै आग्रह–पूर्वाग्रह नराखी खोप सुनिश्चित गर्न उनले जोड दिए ।
कार्यक्रममा प्रस्तुत तथ्यांकअनुसार विश्वभर पाठेघरको मुखको क्यान्सरबाट करिब ६ लाख ७० हजार महिला प्रभावित छन् भने वार्षिक करिब २ लाख ११ हजारको मृत्यु हुने गरेको छ । पोखरिया नगरपालिकामा हरेक वर्ष निःशुल्क परीक्षणका क्रममा करिब ४ सय महिलाको जाँच हुने गरेको र तीमध्ये ३ जनामा पोजेटिभ देखिएको जानकारी पटेलले दिए । हाल नगरभित्र ३४ जना बिरामीले स्वास्थ्य सहयोग पाइरहेका छन्, जसमध्ये १५ जना क्यान्सर पीडित रहेका छन् ।
नेपालमा दैनिक चार जना महिलाको पाठेघरको मुखको क्यान्सरका कारण मृत्यु हुने तथ्य पनि कार्यक्रममा प्रस्तुत गरिएको थियो । अविवाहित बालिका तथा किशोरीलाई लक्षित गरी दिइने एचपीभी खोपले भविष्यमा क्यान्सरको जोखिम कम गर्ने विश्वास व्यक्त गरिएको छ । अभिमुखीकरण कार्यक्रम पोखरिया नगरप्रमुख प्रद्युम्न प्रसाद चौहानको अध्यक्षतामा सम्पन्न भएको थियो । उनले अभियान सफल बनाउन सबै पक्षबाट सहयोग आवश्यक रहेको उल्लेख गर्दै नगरभित्रका लक्षित बालिका तथा किशोरीसम्म खोप पुग्ने सुनिश्चित गर्न आग्रह गरे ।
कार्यक्रममा उपप्रमुख रुबी ठाकुर, प्रमुख प्रशासकीय अधिकृत कौशलकिशोर झा, वडाअध्यक्षहरू, कार्यपालिका सदस्यहरू, नेपाल रेडक्रस सोसाइटी उपशाखा पोखरियाका प्रतिनिधि, विद्यालयका प्रधानाध्यापक, शिक्षक, सञ्चारकर्मी, स्वास्थ्यकर्मी तथा कर्मचारीहरूको सहभागिता रहेको थियो ।
प्रतिक्रिया दिनुहोस् !