वीरगंज (पर्सा), २० माघ । सिलाई तथा गार्मेन्ट सम्बन्धी दुई महिने व्यावसायिक तालिम मंगलबारदेखि वीरगंजमा शुरु भएको छ । वीरगंज उद्योग वाणिज्य संघ र एम.बी. फेशनको संयुक्त आयोजनामा संचालन गरिएको उक्त तालिमको उद्घाटन कार्यक्रममा बोल्दै वीरगंज उद्योग वाणिज्य संघका अध्यक्ष हरि गौतमले सीपमूलक तालिमले रोजगारी सिर्जना र आत्मनिर्भरता बढाउने बताए ।
उनले यस्ता तालिम मार्फत स्थानीय युवायुवती तथा महिलालाई सीपयुक्त बनाइ उद्यमशीलतामा जोड्न सकिने भन्दै उद्योग व्यवसायको विकासका लागि सीप विकास अपरिहार्य रहेको धारणा व्यक्त गरे । महिला उद्यमी समितिकी संयोजक डा. लक्ष्मी थापाले सीप विकासले महिलाको आर्थिक सशक्तीकरणमा महत्वपूर्ण भूमिका खेल्ने बताइन् । उनले यस्तो तालिमले स्वरोजगार सिर्जना गर्नुका साथै स्थानीय उद्योग प्रवद्र्धनमा समेत सहयोग पुग्ने बताइन् ।
कार्यक्रममा एम.बी. फेशनका प्रमुख मनोज बावडीले तालिमलाई पूर्ण रुपमा व्यवहारिक बनाई सहभागीहरुलाई आधुनिक प्रविधि, डिजाइन तथा बजारको माग अनुसार दक्ष बनाइने बताउँदै तालिम पश्चात आवश्यक सहजीकरण र मार्गदर्शन गर्दै सहभागीहरुलाई स्वरोजगार तथा व्यवसायिक क्षेत्रमा स्थापित गराउने यस एम.बी. फेशनको लक्ष्य रहेको बताए ।
महिलाहरुलाई सीपमूलक तालिम प्रदान गरी आत्मनिर्भर बनाउनु उद्देश्यले आयोजना गरिएको उक्त तालिममा १३ जना महिलाको सहभागिता रहेको छ । तालिममा सहभागीहरुले स्वरोजगार तथा व्यवसायिक क्षेत्रमा अवसर प्राप्त गर्ने अपेक्षा राखेका छन् ।
कार्यक्रममा महिला समितिकी सहसंयोजक राधा हमाल, एनभीक्यु एसमा म्यानेजर प्रदिप गौतम, महिला समितिकी सदस्य अपसना खानले तालिम सहभागीहरुलाई सीप विकास मार्फत आर्थिक सशक्तिकरण सम्भव हुने भन्दै तालिमलाई सफल बनाउन लगनशील भएर सिक्न आग्रह गरेका थिए ।
प्रतिक्रिया दिनुहोस् !