वीरगंज (पर्सा), १९ माघ । समाजवादी प्रेस संगठन र प्रेस सेन्टर नेपाल पर्साले नेपाली कम्युनिष्ट पार्टी (नेकपा) पर्साका चारवटै निर्वाचन क्षेत्रका प्रतिनिधिसभा उम्मेदवारहरूसँग सोमबार परिचयात्मक तथा अन्तरक्रिया कार्यक्रम सम्पन्न गर्दै आगामी निर्वाचनमा उम्मेदवारहरूको प्रचार-प्रसार र समन्वयमा सक्रिय भूमिका निर्वाह गर्ने निर्णय गरेको छ । सोही निर्णयअनुसार चारवटै निर्वाचन क्षेत्रमा प्रचार–प्रसारको सहजीकरणका लागि एक-एक जना संयोजकको जिम्मेवारीसमेत तोकिएको छ ।
समाजवादी प्रेस संगठन र प्रेस सेन्टर नेपालबीचको संयुक्त बैठकले पर्सा निर्वाचन क्षेत्र नं. १ मा प्रेस सेन्टर नेपाल मधेश प्रदेशका अध्यक्ष नीरज पिठाकोटे, क्षेत्र नं. २ मा समाजवादी प्रेस संगठन मधेश प्रदेशका अध्यक्ष मनोज पटेल, क्षेत्र नं. ३ मा प्रेस सेन्टर नेपाल पर्साका अध्यक्ष शिवनाथ यादव र क्षेत्र नं. ४ मा समाजवादी प्रेस संगठन पर्साका अध्यक्ष शम्भु कुमार सुमनलाई संयोजकको जिम्मेवारी दिएको हो ।
अन्तरक्रियामा सहभागी चारवटै निर्वाचन क्षेत्रका नेकपा उम्मेदवारहरूले अन्य दलका उम्मेदवारहरूले पैसाको बलमा प्रचार-प्रसार गरिरहेको भएपनि नेकपाका उम्मेदवारहरूको व्यक्तिगत पृष्ठभूमि, इमान्दार छवि र पार्टीले अघि सारेको राष्ट्रिय एजेण्डाका कारण मतदाता आफूहरूप्रति विश्वस्त रहेको धारणा व्यक्त गरे ।
कार्यक्रममा पर्सा क्षेत्र नं. १ का उम्मेदवार सि.ए. अजय चौरसियाले आफू अनुभवी, योजनाबद्ध र जनताका समस्या बुझ्ने योग्य उम्मेदवार भएको दाबी गर्दै निर्वाचित भए शिक्षा, स्वास्थ्य, रोजगारी र पूर्वाधार विकासलाई प्राथमिकतामा राखेर काम गर्ने प्रतिबद्धता जनाए । ‘मसँग यस क्षेत्रको समग्र विकासका लागि स्पष्ट योजना र दीर्घकालीन भिजन छ,’ उनले भने ।
पर्सा क्षेत्र नं. २ का उम्मेदवार मनोज चौधरीले फागुन २१ गते हुने निर्वाचनमा आफ्नो जित सुनिश्चित रहेको दाबी गर्दै आफू पैसाको बलमा होइन, जनताको विश्वासका आधारमा चुनाव लडिरहेको स्पष्ट पारे । कांग्रेस र एमालेको संयुक्त सरकारका कारण मुलुकमा जेन-जी असन्तोष बढेको आरोप लगाउँदै उनले निर्वाचित भए युवाको चाहनाअनुसार नीति तथा कार्यक्रम कार्यान्वयन गर्ने प्रतिबद्धता व्यक्त गरे ।
पर्सा क्षेत्र नं. ३ का उम्मेदवार छोटेलाल यादवले आगामी निर्वाचनमा सही उम्मेदवारको पहिचान अत्यन्तै आवश्यक रहेको बताउँदै आफू जनतासँग प्रत्यक्ष जोडिएको, योग्य र सक्षम उम्मेदवार भएको दाबी गरे । कांग्रेसका उम्मेदवार पटक–पटक सांसद र मन्त्री बने पनि क्षेत्रमा उल्लेखनीय विकास नगरेको आरोप लगाउँदै उनले आफू निर्वाचित भए पर्सा–३ को समग्र विकास गरेर देखाउने बताए ।
त्यस्तै, पर्सा क्षेत्र नं. ४ का उम्मेदवार जयप्रकाश थारुले कम्युनिष्ट आन्दोलनबाट राजनीतिक यात्रा सुरु गरी गाविस अध्यक्षदेखि संविधानसभा सदस्यसम्मको जिम्मेवारी सफलतापूर्वक निर्वाह गरेको उल्लेख गर्दै आफूलाई विकासप्रेमी नेताका रूपमा जनताले चिनेको दाबी गरे । सुपौलीमा इलाका प्रशासन कार्यालय स्थापना गर्न पहल गरी नागरिकताका लागि सदरमुकाम धाउनुपर्ने बाध्यताको अन्त्य गरेको स्मरण गराउँदै उनले विकास निर्माणका कामहरू विवादरहित रूपमा सम्पन्न भएकै कारण जनविश्वास प्राप्त भएको बताए ।
अन्तरक्रिया कार्यक्रममा नेकपाका केन्द्रीय सदस्यहरू रामचन्द्र साह, विजय महतो, बालगोपाल थापा, बाबुराम कौशिक, बृजलाल पासवान, नेता बलिराम साह, रामदरश कुशवाहा, प्रभाकर गुप्ता लगायत प्रेस सेन्टर नेपाल र समाजवादी प्रेस संगठनसँग आबद्ध पत्रकारहरूको उल्लेखनीय उपस्थिति रहेको थियो ।
लिंकरोडस्थित होटल कुमु प्यालेसमा सम्पन्न कार्यक्रमको सहजीकरण प्रेस सेन्टर पर्साका अध्यक्ष शिवनाथ यादवले गरेका थिए ।
प्रतिक्रिया दिनुहोस् !