वीरगंज (पर्सा), १४ माघ । पर्सा क्षेत्र नम्बर २ अन्तर्गत पर्ने विन्दवसनी क्षेत्रमा राष्ट्रिय स्वतन्त्र पार्टी (रास्वपा) का उम्मेदवार सुशिल साह कानुको घरदैलो अभियान उत्साहजनक रूपमा सम्पन्न भएको छ । युवाहरू तथा स्थानीय बासिन्दाको उल्लेखनीय सहभागितासहित सम्पन्न कार्यक्रमले क्षेत्रभर सकारात्मक सन्देश दिएको पार्टीले जनाएको छ ।
स्थानीय तहमा पार्टी संगठन मजबुत बनाउने र जनसम्पर्क विस्तार गर्ने उद्देश्यले सञ्चालन गरिएको घरदैलो कार्यक्रममा पार्टीका केन्द्रीय, प्रदेश तथा स्थानीय तहका नेताकार्यकर्ताको सक्रिय उपस्थिति रहेको थियो । ‘अबको परिवर्तन युवाको नेतृत्व’ भन्ने नाराका साथ अघि बढाइएको कार्यक्रममा युवाहरूको उत्साह र सहभागिता उल्लेखनीय देखिएको थियो ।
कार्यक्रमका क्रममा पार्टी प्रतिनिधिहरू विन्दवसनी क्षेत्रका विभिन्न टोल–बस्तीमा पुगेर स्थानीयसँग प्रत्यक्ष संवादमा जुटेका थिए । सो अवसरमा स्थानीयवासीहरूले विकासका चुनौती, रोजगारी, शिक्षा, स्वास्थ्य, खानेपानी तथा पूर्वाधारसम्बन्धी समस्या र सुझावहरू खुलस्त रूपमा राखेका थिए । प्रतिनिधिहरूले ती विषयलाई गम्भीरतापूर्वक सुन्दै आगामी दिनमा नीतिगत तथा कार्यक्रमगत रूपमा सम्बोधन गर्ने प्रतिबद्धता जनाएका थिए ।
घरदैलोका क्रममा रास्वपाले आफ्ना नीति, सिद्धान्त र भावी योजनाबारे जानकारी गराउँदै पारदर्शी शासन, सुशासन, जवाफदेही राजनीति तथा जनअपेक्षाअनुसारको विकास नै पार्टीको मूल लक्ष्य भएको स्पष्ट पारेको थियो । पार्टीका अनुसार यस्ता अभियानले जनताको वास्तविक समस्या बुझ्न र समाधानमुखी प्रभावकारी नीति निर्माण गर्न महत्वपूर्ण सहयोग पुग्ने विश्वास लिइएको छ । आगामी दिनमा पनि यस्ता घरदैलो कार्यक्रमलाई निरन्तरता दिने योजना रहेको रास्वपाले जनाएको छ ।
प्रतिक्रिया दिनुहोस् !