वीरगंज (पर्सा), १३ माघ । पर्सा निर्वाचन क्षेत्र नम्बर-२ मा राष्ट्रिय स्वतन्त्र पार्टी (रास्वपा)को अगुवा नेता तथा कार्यकर्ताको भेला सम्पन्न भएको छ । भेलामा पार्टी संगठन मजबुत बनाउने, आगामी राजनीतिक तथा चुनावी रणनीति तय गर्ने र क्षेत्रका विविध जनसमस्याका विषयमा विस्तृत छलफल गरिएको पार्टी स्रोतले जनाएको छ ।
भेलामा सहभागी अगुवा नेता तथा कार्यकर्ताहरूले सुशासन, भ्रष्टाचार नियन्त्रण तथा पारदर्शी र उत्तरदायी राजनीतिक अभ्यासलाई पार्टीको मूल एजेण्डा बनाउँदै नागरिकको आवाज सशक्त रूपमा संसदसम्म पुर्याउने प्रतिबद्धता व्यक्त गरे । वक्ताहरूले परम्परागत राजनीति नागरिकमैत्री हुन नसकेको टिप्पणी गर्दै अब नयाँ सोच र कार्यशैली अपरिहार्य भएको धारणा राखे ।
कार्यक्रममा स्थानीय तहमा पार्टी संगठनलाई अझ प्रभावकारी बनाउने, जनसम्पर्क विस्तार गर्ने, नयाँ कार्यकर्तालाई सक्रिय रूपमा समेट्ने तथा पुराना कार्यकर्तासँग समन्वय बलियो बनाउने विषयलाई विशेष प्राथमिकता दिइएको थियो । साथै पार्टीको नीति, सिद्धान्त र कार्यदिशाबारे स्पष्टता ल्याउँदै आगामी दिनमा जनतामाझ पुग्ने रणनीतिबारे समेत छलफल गरिएको थियो ।
भेलामा पर्सा–२ क्षेत्रका विभिन्न स्थानबाट आएका कार्यकर्ताहरूको उल्लेखनीय सहभागिता रहेको थियो । कार्यक्रममा बोल्ने वक्ताहरूले नीतिगत, जवाफदेही र परिणाममुखी राजनीति आजको आवश्यकता भएको उल्लेख गर्दै राष्ट्रिय स्वतन्त्र पार्टी सोही दिशामा अघि बढिरहेको बताए ।
आगामी फागुन २१ गते हुने निर्वाचनलाई लक्षित गर्दै पार्टीका उम्मेदवार सुशिल साह कानुलाई विजयी गराउने रणनीतिमाथि पनि गम्भीर छलफल भएको जनाइएको छ । निर्वाचनमा पार्टीको पकड मजबुत बनाउने, घरदैलो अभियान प्रभावकारी बनाउने तथा मतदातासँग प्रत्यक्ष संवाद बढाउने विषयमा कार्ययोजना तयार गरिएको बताइएको छ ।
भेलाका अवसरमा नयाँ र पुराना कार्यकर्ताबीच आपसी परिचय र सहकार्य विस्तार हुनुका साथै संगठनात्मक एकता थप बलियो बनेको सहभागीहरूले बताएका छन् । पार्टीले यस्ता भेलालाई आगामी दिनमा पनि निरन्तरता दिँदै स्थानीय स्तरमै नागरिकसँग प्रत्यक्ष संवादमार्फत जनआधारित राजनीति अघि बढाउने जनाएको छ ।
प्रतिक्रिया दिनुहोस् !