वीरगंज (पर्सा), १३ माघ । पर्सा निर्वाचन क्षेत्र नम्बर-१ बाट जनमत पार्टीका उम्मेदवार ओमप्रकाश सरार्फले वीरगंज महानगरपालिका वडा नम्बर–३२ स्थित चोर्नी टोलमा भेटघाट, संवाद तथा घरदैलो कार्यक्रम सम्पन्न गरेका छन् । घरदैलो अभियानका क्रममा उम्मेदवार सरार्फले औद्योगिक नगरी वीरगंजमै रोजगारीको अभावका कारण युवाहरू विदेशिन बाध्य भएको अवस्थाप्रति गम्भीर चिन्ता व्यक्त गरेका थिए ।
आफू निर्वाचित भए यस क्षेत्रका एकजना पनि युवा बेरोजगार नबस्ने वातावरण सिर्जना गर्न स्वरोजगारमूलक कार्यक्रमहरूलाई प्राथमिकता दिइने प्रतिबद्धता जनाए । निकास र विकासका लागि जनमत पार्टी र पार्टीको चुनाव चिन्ह ‘हर्न’ नै उपयुक्त विकल्प भएको उल्लेख गर्दै उनले सबै मतदातालाई जनमत पार्टीमा एकताबद्ध हुन आग्रह गरे ।
कार्यक्रममा जनमत पार्टीका नेता बिध्यालाल प्रसाद, रम्भा मिश्रा, भुपेन्द्र साह, सीए देवराज, डा. मनोज कुमार, दिनानाथ साह, सहनवाज राकी, सत्ययुग साह, नरेश राम, सिकेश महतो, निराजन कुशवाहा, शिव यादवलगायतको उपस्थिति रहेको थियो । साथै स्थानीय युवा दिलिप पासवान, दिनेश हजरा, सरोज पटेलसहित सयौंको संख्यामा कार्यकर्ता तथा स्थानीयवासीको उल्लेखनीय सहभागिता रहेको जनाइएको छ ।
घरदैलोका क्रममा सरार्फले स्थानीय बासिन्दाका समस्या र सुझावहरू ध्यानपूर्वक सुन्दै युवामैत्री, रोजगारीमुखी तथा विकासकेन्द्रित राजनीतिलाई आफ्नो मुख्य प्राथमिकता बनाउने स्पष्ट पारेका थिए ।
प्रतिक्रिया दिनुहोस् !