वीरगंज (पर्सा), १३ माघ । पर्सा निर्वाचन क्षेत्र नम्बर–३ बाट नेकपा (एमाले)का तर्फबाट उम्मेदवारी दिएका रूपेश पाण्डे फरक शैली, आत्मविश्वास र स्पष्ट दृष्टिकोणका साथ चुनावी प्रतिस्पर्धामा उत्रिएका छन् । काठमाडौंमा स्थापित व्यवसाय छाडेर पछिल्ला करिब चार वर्षदेखि गाउँ–गाउँ पुग्दै आएका पाण्डे आफूलाई ‘नेता’भन्दा बढी जनताको दुःख–सुखको साथी र विकासको अग्रदूतका रूपमा चिनाउँदै आएका छन् ।
व्यवसायिक जीवनमा सफलता पाएपनि जन्मभूमिको अवस्था देखेर चुप बस्न नसकी राजनीतिमा होमिएको पाण्डेको भनाइ छ । उनले विगत चार वर्षमा क्षेत्रका सबै वडामा पुगेर जनताका समस्या नजिकबाट बुझेको दाबी गर्दै ती समस्या समाधान गर्ने ठोस योजनासहित यसपटक चुनावी मैदानमा उत्रिएको बताएका छन् ।
पाण्डेका अनुसार पर्सा–३ मा कृषि उपजले बजार नपाउनु सबैभन्दा ठूलो समस्या बनेको छ । किसानले उत्पादन गरेका तरकारी, दूध र अन्डाले उचित मूल्य र बजार नपाउँदा यसको प्रत्यक्ष असर युवा पलायनमा परेको उनले बताए । यस अवस्थाको अन्त्य गर्न उनले क्षेत्रमा चारवटा कोल्ड स्टोर स्थापना गरी उत्पादनदेखि बजारीकरणसम्मको शृंखला व्यवस्थित गर्ने योजना सार्वजनिक गरेका छन् ।
शिक्षा र स्वास्थ्यतर्फ संकेत गर्दै पाण्डेले विद्यालय र स्वास्थ्य संस्था पर्याप्त भए पनि सेवाको गुणस्तर कमजोर रहेको बताए । निर्वाचित भएमा सांसदको हैसियतमा नीतिगत पहलसँगै विद्यालय र स्वास्थ्य संस्थाको नियमित अनुगमन गर्ने प्रतिबद्धता उनले व्यक्त गरेका छन् ।
खानेपानी, सडक र सिँचाइ जस्ता पूर्वाधारमा भइरहेको ढिलाइ नेतृत्वको इच्छाशक्ति कमजोर भएकै कारण भएको दाबी गर्दै पाण्डेले आफू विकास र परिणाममुखी राजनीतिका लागि उम्मेदवार बनेको स्पष्ट पारे । पर्सा–३ को समग्र रूपान्तरण नै आफ्नो मुख्य लक्ष्य रहेको उनको भनाइ छ ।
प्रतिक्रिया दिनुहोस् !