वीरगंज (पर्सा), १३ माघ । मधेश साहित्य महोत्सवको दोस्रो संस्करण यस वर्ष पनि वीरगंजमा आयोजना हुने भएको छ । यही माघ १५, १६ र १७ गते वीरगंजस्थित मधेश विश्वविद्यालय परिसरमा सञ्चालन हुने महोत्सवको तयारी अन्तिम चरणमा पुगेको आयोजक संस्था उत्कर्ष नेपालले जनाएको छ । मंगलबार आयोजित पत्रकार सम्मेलनमार्फत महोत्सवका कार्यक्रम, उद्देश्य र संरचनाबारे विस्तृत जानकारी सार्वजनिक गरिएको हो ।
पत्रकार सम्मेलनमा उत्कर्ष नेपालका अध्यक्ष रितु राज पटेलले मधेश साहित्य महोत्सव अब केवल कार्यक्रम नभई साझा सांस्कृतिक आन्दोलनका रूपमा विकसित हुँदै गएको बताए । पहिलो संस्करणले अभूतपूर्व सहभागिता, सकारात्मक ऊर्जा र सार्वजनिक अपनत्व पैदा गरेको उल्लेख गर्दै उनले मधेश र समग्र नेपालका विविध भाषा, पहिचान र संस्कृतिलाई जोड्ने मञ्चका रूपमा महोत्सव स्थापित हुँदै गएको धारणा राखे ।
‘पहिलो संस्करणको सफलताले हामीलाई स्पष्ट सन्देश दिएको छ मधेश साहित्य महोत्सव एउटा कार्यक्रम मात्र होइन, यो आवश्यकता थियो,’ उनले भने, ‘त्यही विश्वासका साथ दोस्रो संस्करण (एमएलएफ २०२६) लाई अझ समावेशी, गहिरो र समुदाय–केन्द्रित बनाउँदै अघि बढाएका छौं ।’
मधेश विश्वविद्यालयका उपकुलपति डा. दिपक शाक्यले चुनौतीपूर्ण परिस्थितिका बाबजुद वीरगंज साहित्य र संस्कृतिको उत्सव मनाउन तयार रहेको बताए । वीरगंज बिस्तारै मधेश र समग्र नेपाललाई जोड्ने ‘कनेक्टिङ पोइन्ट’ बन्दै गएको उल्लेख गर्दै उनले देशभरिका स्रष्टा, कलाकार, चिन्तक र युवाहरूको साझा भेटघाटस्थलका रूपमा शहर विकसित हुँदै गएको बताए ।
आयोजक संस्थाका जय साहका अनुसार यस संस्करणमा विद्यालय तथा कलेजका विद्यार्थी, युवा, महिला, दलित तथा सीमान्तकृत समुदाय, नागरिक समाज र स्थानीय संस्थाहरूलाई विशेष केन्द्रमा राखिएको छ । महोत्सवअघि आयोजना हुने ‘एमएलएफ ट्यालेन्ट हन्ट’ कार्यक्रममार्फत नयाँ पुस्ताका सिर्जनशील आवाजलाई सार्वजनिक मञ्च प्रदान गरिने उनको भनाइ छ ।
महोत्सव सफल बनाउन वीरगंज महानगरपालिका, मधेश विश्वविद्यालय, मधेश प्रदेश सरकारसहित निजी तथा गैर–निजी संघसंस्था र नागरिक समाजको महत्वपूर्ण सहयोग रहने आयोजकले जनाएको छ । उत्कर्ष नेपालले सञ्चारमाध्यम, साहित्यप्रेमी, युवा, कलाकार तथा नागरिक समाजलाई महोत्सवमा सहभागी भई मधेशको कथा, स्वर र सपनालाई एउटै मञ्चमा जोड्न आग्रह गरेको छ ।
आयोजक संस्थाकी सलमा खातुनका अनुसार महोत्सवको उद्घाटन मधेश प्रदेशका मुख्यमन्त्री कृष्ण प्रसाद यादवले गर्ने कार्यक्रम तय भएको छ । उद्घाटन सत्र महोत्सवका संरक्षक तथा वीरगंज महानगरपालिकाका प्रमुख राजेशमान सिंहको अध्यक्षतामा सम्पन्न हुनेछ ।
महोत्सवका सल्लाहकार गणेश लाठले जानकारी दिएअनुसार कार्यक्रम ‘बीज पत्र–गाउँः स्मृति, मिथक र यथार्थ’ विषयक सत्रबाट डा. भास्कर गौतमद्वारा उद्घाटन गरिनेछ । तीन दिनसम्म सञ्चालन हुने महोत्सवमा १६ वटा सत्र रहनेछन्, जहाँ विशेष रूपमा गाउँघरका विषयवस्तु र स्थानीय कलाकारलाई प्राथमिकता दिइनेछ ।
यस वर्षको महोत्सवको मुख्य आकर्षणका रूपमा विशेष सांगीतिक साँझ आयोजना गरिनेछ, जसमा भारतकी चर्चित भोजपुरी गायिका कल्पना पटवारीसहित स्थानीय कलाकारहरूको प्रस्तुति रहनेछ । दर्शकको सम्भावित भीडलाई मध्यनजर गर्दै उक्त सांस्कृतिक कार्यक्रम वीरगंजको आदर्शनगरस्थित पुरानो बसपार्कमा आयोजना गरिने आयोजकले जनाएको छ ।
उत्कर्ष नेपालका अध्यक्ष रितु राज पटेलको अध्यक्षतामा मधेश विश्वविद्यालयको सभाहलमा सम्पन्न पत्रकार सम्मेलनमा नेपाल पत्रकार महासंघ पर्साका अध्यक्ष गणेश लाठ, भोजपुरी प्रतिष्ठानका श्याम सर्राफलगायत विभिन्न सञ्चारमाध्यममा आबद्ध पत्रकारहरूको उल्लेखनीय उपस्थिति रहेको थियो ।
प्रतिक्रिया दिनुहोस् !