वीरगंज (पर्सा), ११ माघ । आगामी फागुन २१ गते हुने प्रतिनिधिसभा निर्वाचनमा पर्सा जिल्लामा जनता समाजवादी पार्टी (जसपा) नेपाल कमजोर अवस्थामा देखिएको छ । २०७४ सालको निर्वाचनमा तीन र २०७९ सालको निर्वाचनमा एक क्षेत्रमा मात्र जीत हासिल गरेको जसपा यसपटक भने अपेक्षित प्रभाव देखाउन असफल भएको राजनीतिक विश्लेषकहरूको भनाइ छ ।
पर्सासहित मधेस प्रदेशमै प्रभावशाली मानिँदै आएको उपेन्द्र यादव नेतृत्वको जसपा, जेनजी आन्दोलनपछिको राजनीतिक उतारचढाव र महन्त ठाकुर नेतृत्वको लोकतान्त्रिक समाजवादी पार्टी (लोसपा) सँग एकता गरेपछि पनि संगठनात्मक रूपमा सुदृढ हुन सकेको छैन । यस निर्वाचनमा जसपाले पर्साका चारवटै निर्वाचन क्षेत्रमा उम्मेदवार खडा गरे पनि क्षेत्र नम्बर ४ बाहेक अन्य क्षेत्रमा उम्मेदवारहरू प्रभावकारी प्रतिस्पर्धामा नदेखिएको विश्लेषकहरू बताउँछन् ।
जसपाले पर्सा क्षेत्र नम्बर १ मा जिल्ला अध्यक्ष रामनरेश यादव, क्षेत्र नम्बर २ मा उद्योगी अशोक टेमानी, क्षेत्र नम्बर ३ मा नागेन्द्र प्रसाद यादव र क्षेत्र नम्बर ४ मा डा. कृपासिन्धु प्रसाद चौधरीलाई उम्मेदवार बनाएको छ । तर क्षेत्र नम्बर ४ बाहेक अन्य क्षेत्रमा जसपाका उम्मेदवार कमजोर देखिएको बताइन्छ ।
विशेषगरी पर्सा क्षेत्र नम्बर १ मा जसपा नेपालबाट निर्वाचित पूर्वमन्त्री तथा निवर्तमान सांसद प्रदीप यादव र वीरगंज महानगरपालिकाका मेयर राजेशमान सिंहले पार्टी परित्याग गरेपछि जसपा थप कमजोर बनेको छ । निवर्तमान सांसद यादव यसपटक एमालेका उम्मेदवार बनेकाले पनि यस क्षेत्रमा जसपाको संगठनमा ठुलो असर परेको छ ।
त्यसैगरी पर्सा क्षेत्र नम्बर २ मा नयाँ अनुहारलाई उम्मेदवार बनाइएको र उक्त क्षेत्रमा उनको राजनीतिक पकड तथा लगानी कमजोर भएकाले पनि जसपा कमजोर देखिएको जनाइएको छ । पर्सा क्षेत्र नम्बर ३ मा योग्य उम्मेदवार नपाएपछि स्थानीय नेतालाई उम्मेदवार बनाउनुपरेको जसपाका स्रोतको भनाइ छ । यस क्षेत्रअन्तर्गतका कुनै पनि पालिकामा जसपाले अहिलेसम्म चुनाव जित्न नसकेको इतिहासले पनि पार्टीको अवस्था कमजोर बनाएको बताइएको छ ।
तर पर्सा क्षेत्र नम्बर ४ मा भने जसपा अपेक्षाकृत बलियो देखिएको छ । कांग्रेसबाट डा. कृपासिन्धु प्रसाद चौधरीलाई पार्टीमा भित्र्याएर उम्मेदवार बनाइएको र यस क्षेत्रअन्तर्गतका दुई पालिकाका प्रमुख तथा एक प्रदेशसभा सदस्य जसपाबाट निर्वाचित भएकाले पार्टीको आधार बलियो रहेको जनाइएको छ ।
यसका साथै कांग्रेस, एमाले र नेकपाका उम्मेदवारहरू पहिल्यै ‘परीक्षित’ भइसकेको अवस्थामा डा. चौधरी नयाँ र स्वीकार्य अनुहारका रूपमा देखिएकाले पर्सा–४ मा जसपाको प्रतिस्पर्धात्मक स्थिति अपेक्षाकृत मजबुत मानिएको छ ।
प्रतिक्रिया दिनुहोस् !