वीरगंज (पर्सा), ११ माघ । फागुन २१ गते हुने प्रतिनिधिसभा सदस्य निर्वाचनको लागि नेपाली काँग्रेस पार्टीबाट क्षेत्र नं. १ मा उम्मेदवारी दिएका अनिल रुङ्गटाले वीरगंज महानगरपालिका–३१ बेल्वामा रात्रीकालीन भेटघाट तथा राजनीतिक छलफल कार्यक्रममार्फत स्थानीयवासीहरूसँग प्रत्यक्ष संवाद गरेका छन् ।
संवादका क्रममा स्थानीयले गरेको गुनासोलाई समेट्दै सम्बोधनको क्रममा उनले स्थानीय स्तरमा रहेका समस्याहरू दीर्घकालीन रूपमा समाधान गर्न आफू प्रतिबद्ध रहेको बताएका थिए । उनले जनताको दैनिक जीवनसँग प्रत्यक्ष जोडिएका समस्या बुझेर व्यवहारिक, प्रभावकारी र दिगो समाधान खोज्नु नै आफ्नो मुख्य एजेण्डा रहेको स्पष्ट पारेका थिए । उनले विकास केवल भाषणमा सीमित नभई स्थानीय आवश्यकता अनुसार योजना बनाएर कार्यान्वयन गर्नुपर्नेमा जोड दिए ।
उनले भने, ‘स्थानीयवासीहरूले उठाएका सडक, सुरक्षा, सार्वजनिक सम्पत्ति र कृषि सम्बन्धी गुनासोहरू गम्भीर छन् । यी समस्या समाधानका लागि संघीय तहबाट आवश्यक पहल, सम्बन्धित निकायसँग समन्वय र जनताको सहभागितामा योजनाबद्ध ढंगले अघि बढ्नेछु । जनताको विश्वास नै मेरो सबैभन्दा ठूलो शक्ति हो ।’
वडा इकाइ सभापति अनिरुद्ध प्रसाद थारुको अध्यक्षतामा सम्पन्न उक्त कार्यक्रममा वडा इकाइ कमिटीका पदाधिकारी, समाजसेवी तथा स्थानीय अगुवाहरूसँग सम्पन्न छलफलमा बेल्वाका बासिन्दाहरूले भौतिक पूर्वाधार, सडक निर्माण, प्रहरी चौकीको अभाव, सार्वजनिक जग्गा–जमिन संरक्षण तथा कृषि सम्बन्धी विविध समस्याबारे गुनासो राखेका थिए ।
कार्यक्रममा नेपाली कांग्रेस पर्साका पूर्व सभापति अजय द्विवेदी, पर्साका कार्यवाहक सभापति रामनारायण कुर्मी, विजय सर्राफ, अरबिन्द गुप्ता, किरण सरकारलगायत स्थानीय नेता, जनप्रतिनिधि, समाजसेवी तथा युवा अगुवाहरूको उल्लेखनीय उपस्थिति रहेको थियो । सहभागीहरूले स्थानीय विकास, संगठन सुदृढीकरण र जनअपेक्षालाई केन्द्रमा राखेर राजनीति अघि बढाउनुपर्ने धारणा व्यक्त गरेका थिए । कार्यक्रमले स्थानीय तहका समस्या उजागर गर्नुका साथै समाधानका लागि साझा प्रतिबद्धता जनाउने महत्वपूर्ण अवसर बनेको सहभागीहरूले बताएका छन् ।
प्रतिक्रिया दिनुहोस् !